ab wo humse mila nahin karte

ab vo ham se milā nahīñ karte

ham bhī koī gila nahīñ karte

zaḳhm-e-dil bharte bharte bharte haiñ

itnī jaldī bharā nahīñ karte

log vo shāḳh kaaT dete haiñ

phuul jis par khilā nahīñ karte

mat bujhāo diye umīdoñ ke

ye diye phir jalā nahīñ karte

ek muddat se vo nahīñ aa.e

ham bhī ab hausla nahīñ karte

aag bujhtī hai dil kī rone se

daaġh dil ke dhulā nahīñ karte

jag meñ un kā bhalā nahīñ hotā

jo kisī kā bhalā nahīñ karte

chaal duniyā ko jo nahīñ bhātī

chaal aisī chalā nahīñ karte

rafta rafta bahār aatī hai

phuul yak dam khilā nahīñ karte

haañ sahar ho to Duub jaate haiñ

shab ko taare Dhalā nahīñ karte

'soz' ham nā-sipās logoñ par

rāz-e-hastī khulā nahīñ karte

ab wo hum se mila nahin karte

hum bhi koi gila nahin karte

zaKHm-e-dil bharte bharte bharte hain

itni jaldi bhara nahin karte

log wo shaKH kaT dete hain

phul jis par khila nahin karte

mat bujhao diye umidon ke

ye diye phir jala nahin karte

ek muddat se wo nahin aae

hum bhi ab hausla nahin karte

aag bujhti hai dil ki rone se

dagh dil ke dhula nahin karte

jag mein un ka bhala nahin hota

jo kisi ka bhala nahin karte

chaal duniya ko jo nahin bhati

chaal aisi chala nahin karte

rafta rafta bahaar aati hai

phul yak dam khila nahin karte

han sahar ho to Dub jate hain

shab ko tare Dhala nahin karte

'soz' hum na-sipas logon par

raaz-e-hasti khula nahin karte