ab ye sochun to bhanwar zehn mein paD jate hain

ab ye sochūñ to bhañvar zehn meñ paḌ jaate haiñ

kaise chehre haiñ jo milte hī bichhaḌ jaate haiñ

kyuuñ tire dard ko deñ tohmat-e-vīrānī-e-dil

zalzaloñ meñ to bhare shahr ujaḌ jaate haiñ

mausam-e-zard meñ ik dil ko bachā.ūñ kaise

aisī rut meñ to ghane peḌ bhī jhaḌ jaate haiñ

ab koī kyā mire qadmoñ ke nishāñ DhūñDegā

tez āñdhī meñ to ḳheme bhī ukhaḌ jaate haiñ

shaġhl-e-arbāb-e-hunar pūchhte kyā ho ki ye log

pattharoñ meñ bhī kabhī aa.ine jaḌ jaatī haiñ

soch kā aa.ina dhuñdlā ho to phir vaqt ke saath

chāñd chehroñ ke ḳhad-o-ḳhāl bigaḌ jaate haiñ

shiddat-e-ġham meñ bhī zinda huuñ to hairat kaisī

kuchh diye tund havāoñ se bhī laḌ jaate haiñ

vo bhī kyā log haiñ 'mohsin' jo vafā kī ḳhātir

ḳhud-tarāshīda usūloñ pe bhī aḌ jaate haiñ

ab ye sochun to bhanwar zehn mein paD jate hain

kaise chehre hain jo milte hi bichhaD jate hain

kyun tere dard ko den tohmat-e-virani-e-dil

zalzalon mein to bhare shahr ujaD jate hain

mausam-e-zard mein ek dil ko bachaun kaise

aisi rut mein to ghane peD bhi jhaD jate hain

ab koi kya mere qadmon ke nishan DhunDega

tez aandhi mein to KHeme bhi ukhaD jate hain

shaghl-e-arbab-e-hunar puchhte kya ho ki ye log

pattharon mein bhi kabhi aaine jaD jati hain

soch ka aaina dhundla ho to phir waqt ke sath

chand chehron ke KHad-o-KHal bigaD jate hain

shiddat-e-gham mein bhi zinda hun to hairat kaisi

kuchh diye tund hawaon se bhi laD jate hain

wo bhi kya log hain 'mohsin' jo wafa ki KHatir

KHud-tarashida usulon pe bhi aD jate hain