abas wajud ka dukh tangi-e-hayat ka dukh

abas vajūd kā dukh tañgī-e-hayāt kā dukh

ki dil ne paalā huā hai har ek zaat kā dukh

talāsh-e-jannat-o-dozaḳh meñ rā.egāñ insāñ

zamīñ pe roz manātā hai kā.enāt kā dukh

ka.ī jhameloñ meñ uljhī sī bad-maza chaa.e

udaas mez pe daftar ke kāġhzāt kā dukh

tamām din kī musībat to baañT lī ham ne

kabhī kahā hī nahīñ apnī apnī raat kā dukh

ga.e dinoñ kā koī ḳhvāb dafn hai shāyad

ki ab bhī aañkh se ristā hai bāqiyāt kā dukh

imām-e-tishna kī aulād Thahrī huuñ āḳhir

so mujh ko yaksāñ milā rāvī-o-furāt kā dukh

na jaane mālik-e-kun kis tarah nibhātā hai

ye dastaras kī suhūlat ye mumkināt kā dukh

abas wajud ka dukh tangi-e-hayat ka dukh

ki dil ne pala hua hai har ek zat ka dukh

talash-e-jannat-o-dozaKH mein raegan insan

zamin pe roz manata hai kaenat ka dukh

kai jhamelon mein uljhi si bad-maza chae

udas mez pe daftar ke kaghzat ka dukh

tamam din ki musibat to banT li hum ne

kabhi kaha hi nahin apni apni raat ka dukh

gae dinon ka koi KHwab dafn hai shayad

ki ab bhi aankh se rista hai baqiyat ka dukh

imam-e-tishna ki aulad Thahri hun aaKHir

so mujh ko yaksan mila rawi-o-furaat ka dukh

na jaane malik-e-kun kis tarah nibhata hai

ye dastaras ki suhulat ye mumkinat ka dukh