abhi maujud thi lekin abhi gum ho gai hai

abhī maujūd thī lekin abhī gum ho ga.ī hai

na jaane kis jahāñ meñ zindagī gum ho ga.ī hai

mire hamrāh kyuuñ vo shaḳhs chalnā chāhtā hai

safar ke josh meñ kyā āgahī gum ho ga.ī hai

sabhī ḳhush haiñ ki saare gum-shuda phir mil ga.e haiñ

mujhe ġham hai ki ab terī kamī gum ho ga.ī hai

mire hoñToñ ko dariyā ne kiyā sairāb lekin

hayāt-afroz dil kī tishnagī gum ho ga.ī hai

maiñ us se muddatoñ ke ba.ad dobāra dobārā milā huuñ

ḳhushī to hai magar vāraftagī gum ho ga.ī hai

ye kin tishna-laboñ kī fauj guzrī hai idhar se

kahīñ kuchh kam kahīñ puurī nadī gum ho ga.ī hai

hamesha jo mujhe izn-e-suḳhan detī rahī thī

hujūm-e-shor meñ vo ḳhāmushī gum ho ga.ī hai

maiñ us kī yaad se bas ek pal ko gum huā thā

magar lagtā hai jaise ik sadī gum ho ga.ī hai

ba-taur-e-rasm hī kār-e-junūñ baaqī hai mujh meñ

vagarna dasht se vābastagī gum ho ga.ī hai

'salīm' us meñ ziyāda farq to ab bhī nahīñ hai

bas itnā hai ki thoḌī sādgī gum ho ga.ī hai

abhi maujud thi lekin abhi gum ho gai hai

na jaane kis jahan mein zindagi gum ho gai hai

mere hamrah kyun wo shaKHs chalna chahta hai

safar ke josh mein kya aagahi gum ho gai hai

sabhi KHush hain ki sare gum-shuda phir mil gae hain

mujhe gham hai ki ab teri kami gum ho gai hai

mere honTon ko dariya ne kiya sairab lekin

hayat-afroz dil ki tishnagi gum ho gai hai

main us se muddaton ke baad dobara dobara mila hun

KHushi to hai magar waraftagi gum ho gai hai

ye kin tishna-labon ki fauj guzri hai idhar se

kahin kuchh kam kahin puri nadi gum ho gai hai

hamesha jo mujhe izn-e-suKHan deti rahi thi

hujum-e-shor mein wo KHamushi gum ho gai hai

main us ki yaad se bas ek pal ko gum hua tha

magar lagta hai jaise ek sadi gum ho gai hai

ba-taur-e-rasm hi kar-e-junun baqi hai mujh mein

wagarna dasht se wabastagi gum ho gai hai

'salim' us mein ziyaada farq to ab bhi nahin hai

bas itna hai ki thoDi sadgi gum ho gai hai