abhi se aa gain nam-e-KHuda hain shoKHiyan kya-kya

abhī se aa ga.iiñ nām-e-ḳhudā haiñ shoḳhiyāñ kyā-kyā

mirī taqdīr ban ban kar badaltī hai zabāñ kyā-kyā

mujhe gardish meñ rakhtī hai nigāh-e-dil-sitāñ kyā-kyā

mirī qismat dikhātī hai mujhe nairañgiyāñ kyā-kyā

nigāhoñ meñ hayā hai aur hayā meñ hai nihāñ kyā-kyā

tabī.at meñ basī haiñ ḳhair se rañgīniyāñ kyā-kyā

faqat ik sādgī par shoḳhiyoñ ke haiñ gumāñ kyā-kyā

adā-e-ḳhāmushī meñ bhar diyā rañg-e-bayāñ kyā-kyā

dil-e-ḳhūñ-gashta-e-hasrat ne kyā kuchh gul khilā.e haiñ

bahār-āgīñ hai kuchh ab kī baras fasl-e-ḳhizāñ kyā-kyā

nigāheñ bad-gumānī se kahāñ jā-jā ke laḌtī haiñ

mirī āñkhoñ meñ haiñ dushman kī bazm-ārā.īyāñ kyā-kyā

tasavvur meñ visāl-e-yār ke sāmān hote haiñ

hameñ bhī yaad haiñ hasrat kī bazm-ārā.īyāñ kyā-kyā

abhī se ban ga.ī mushkil abhī to duur hai manzil

mujhe rusvā kareñgī dekhiye betābiyāñ kyā-kyā

vo jitne duur khiñchte haiñ ta.alluq aur baḌhtā hai

nazar se vo jo pinhāñ haiñ to dil meñ haiñ ayaañ kyā-kyā

abhi se aa gain nam-e-KHuda hain shoKHiyan kya-kya

meri taqdir ban ban kar badalti hai zaban kya-kya

mujhe gardish mein rakhti hai nigah-e-dil-sitan kya-kya

meri qismat dikhati hai mujhe nairangiyan kya-kya

nigahon mein haya hai aur haya mein hai nihan kya-kya

tabiat mein basi hain KHair se ranginiyan kya-kya

faqat ek sadgi par shoKHiyon ke hain guman kya-kya

ada-e-KHamushi mein bhar diya rang-e-bayan kya-kya

dil-e-KHun-gashta-e-hasrat ne kya kuchh gul khilae hain

bahaar-agin hai kuchh ab ki baras fasl-e-KHizan kya-kya

nigahen bad-gumani se kahan ja-ja ke laDti hain

meri aankhon mein hain dushman ki bazm-araiyan kya-kya

tasawwur mein visal-e-yar ke saman hote hain

hamein bhi yaad hain hasrat ki bazm-araiyan kya-kya

abhi se ban gai mushkil abhi to dur hai manzil

mujhe ruswa karengi dekhiye betabiyan kya-kya

wo jitne dur khinchte hain talluq aur baDhta hai

nazar se wo jo pinhan hain to dil mein hain ayan kya-kya