abhi to karna paDega safar dobara mujhe

abhī to karnā paḌegā safar dobāra mujhe

abhī kareñ nahīñ ārām kā ishāra mujhe

lahū meñ aa.egā tūfān-e-tund rāt-ba-rāt

karegī mauj-e-balā-ḳhez pāra-pāra mujhe

bujhā nahīñ mire andar kā āftāb abhī

jalā ke ḳhaak karegā yahī sharāra mujhe

utaar pheñktā maiñ bhī ye tār-tār badan

asīr-e-ḳhāk huuñ karnā paḌā guzāra mujhe

uḌe vo gard ki maiñ chār-sū bikhar jā.ūñ

ġhubār meñ nazar aa.e na koī chāra mujhe

mire hudūd meñ hai mere ās-pās kī dhund

rahā ye shahr to is kā nahīñ ijāra mujhe

sahar huī to bahut der tak dikhā.ī diyā

ġhurūb hotī huī raat kā kināra mujhe

mirī fazā meñ hai tartīb-e-kā.enāt kuchh aur

ajab nahīñ jo tirā chāñd hai sitāra mujhe

na chhū sakūñ jise kyā us kā dekhnā bhī 'zafar'

bhalā lagā na kabhī duur kā nazāra mujhe

abhi to karna paDega safar dobara mujhe

abhi karen nahin aaram ka ishaara mujhe

lahu mein aaega tufan-e-tund raat-ba-raat

karegi mauj-e-bala-KHez para-para mujhe

bujha nahin mere andar ka aaftab abhi

jala ke KHak karega yahi sharara mujhe

utar phenkta main bhi ye tar-tar badan

asir-e-KHak hun karna paDa guzara mujhe

uDe wo gard ki main chaar-su bikhar jaun

ghubar mein nazar aae na koi chaara mujhe

mere hudud mein hai mere aas-pas ki dhund

raha ye shahr to is ka nahin ijara mujhe

sahar hui to bahut der tak dikhai diya

ghurub hoti hui raat ka kinara mujhe

meri faza mein hai tartib-e-kaenat kuchh aur

ajab nahin jo tera chand hai sitara mujhe

na chhu sakun jise kya us ka dekhna bhi 'zafar'

bhala laga na kabhi dur ka nazara mujhe