abr baadal hai aur sahab ghaTa

abr bādal hai aur sahāb ghaTā

jis kī ham dekhte haiñ aaj bahār

kis ko bārāñ ne tāzgī baḳhshī

zar.a khetī hai aur daraḳht ashjār

kaun sī jā hai sair ke qābil

baaġh rauza hadīqa aur gulzār

ab ġharīboñ ko ho ga.ī taskīñ

jo ki lete the qarz-o-vām udhār

qaht hai kaal aur gadā.ī bhiik

jis ke meñh ne miTā diye āsār

jū nadī āb-gīr hai tālāb

meñh jo barsā to bhar ga.e yak-bār

nirḳh hai bhaav aur ġhalla anaaj

sastā arzāñ hai suuq hai bāzār

mardum-o-ādmī bashar insān

fazl-e-bārī ke sab haiñ shukr-guzār

haiñ kushāvarz kāst-kār kisān

ḳhushk-sālī se the bahut nā-chār

meñh barastā rahā ka.ī din raat

roz-o-shab sub.h-o-shām lail-o-nahār

qatra hai buuñd aur meñh bārāñ

aab paanī hai aur bahut bisyār

būñdā-bāndī yahī tarashshoh hai

jaise hai aaj nannhī nannhī phuvār

kaalī kaalī ghaTā hai abr-e-siyāh

jo ki barsā rahī hai ye bauchhār

saaya hai chhāñv āftāb hai dhuup

dekh aaj dhuup chhāñv kī ye bahār

abr baadal hai aur sahab ghaTa

jis ki hum dekhte hain aaj bahaar

kis ko baran ne tazgi baKHshi

zara kheti hai aur daraKHt ashjar

kaun si ja hai sair ke qabil

bagh rauza hadiqa aur gulzar

ab gharibon ko ho gai taskin

jo ki lete the qarz-o-wam udhaar

qaht hai kal aur gadai bhik

jis ke meinh ne miTa diye aasar

ju nadi aab-gir hai talab

meinh jo barsa to bhar gae yak-bar

nirKH hai bhaw aur ghalla anaj

sasta arzan hai suq hai bazar

mardum-o-admi bashar insan

fazl-e-bari ke sab hain shukr-guzar

hain kushawarz kast-kar kisan

KHushk-sali se the bahut na-chaar

meinh barasta raha kai din raat

roz-o-shab subh-o-sham lail-o-nahaar

qatra hai bund aur meinh baran

aab pani hai aur bahut bisyar

bunda-bandi yahi tarashshoh hai

jaise hai aaj nannhi nannhi phuwar

kali kali ghaTa hai abr-e-siyah

jo ki barsa rahi hai ye bauchhaar

saya hai chhanw aaftab hai dhup

dekh aaj dhup chhanw ki ye bahaar