abr-e-siyah qaus-e-quzah chandni ghazal

abr-e-siyāh qaus-e-quzah chāñdnī ġhazal

har manzar-e-hayāt meñ Dhaltī rahī ġhazal

shānoñ pe us ne Daal dī ik surma.ī ġhazal

jaise falak se aa.e koī jhūmtī ġhazal

oḌhī kabhī to ham ne bichā.ī kabhī ġhazal

lekin hamāre kaam na aa.ī koī ġhazal

jab bhī tasavvurāt ne āvāz dī tujhe

tahrīr dil pe ho ga.ī ik chāñd sī ġhazal

har shai huzūr-e-husn meñ nākām ho ga.ī

ho pankhuḌī gulāb kī yā 'mīr' kī ġhazal

kis ke firāq ne use dīvāna kar diyā

phirtī hai maarī maarī galī dar galī ġhazal

vo aur the ki jin ko sahīfe diye ga.e

ham jaise ahl-e-dil pe utārī ga.ī ġhazal

de kar mire ḳhayāl ko tābinda pairahan

ustād-e-mohtaram ne sañvārī mirī ġhazal

paḌhte rahe 'suhaib' baḌī ān-bān se

ham roz mahfiloñ meñ churā.ī huī ġhazal

abr-e-siyah qaus-e-quzah chandni ghazal

har manzar-e-hayat mein Dhalti rahi ghazal

shanon pe us ne Dal di ek surmai ghazal

jaise falak se aae koi jhumti ghazal

oDhi kabhi to hum ne bichai kabhi ghazal

lekin hamare kaam na aai koi ghazal

jab bhi tasawwuraat ne aawaz di tujhe

tahrir dil pe ho gai ek chand si ghazal

har shai huzur-e-husn mein nakaam ho gai

ho pankhuDi gulab ki ya 'mir' ki ghazal

kis ke firaq ne use diwana kar diya

phirti hai mari mari gali dar gali ghazal

wo aur the ki jin ko sahife diye gae

hum jaise ahl-e-dil pe utari gai ghazal

de kar mere KHayal ko tabinda pairahan

ustad-e-mohtaram ne sanwari meri ghazal

paDhte rahe 'suhaib' baDi aan-ban se

hum roz mahfilon mein churai hui ghazal