achchha hua main waqt ke mehwar se kaT gaya

achchhā huā maiñ vaqt ke mehvar se kaT gayā

qatra guhar banā jo samundar se kaT gayā

zinda jo bach ga.e haiñ saheñ nafratoñ ke dukh

apnā galā to pyaar ke ḳhanjar se kaT gayā

mausam bhī munfa.il hai bahut kyā bharūñ uḌaan

rishta havāoñ kā mire shahpar se kaT gayā

palkoñ par apnī kaun mujhe ab sajā.egā

maiñ huuñ vo rañg jo tire paikar se kaT gayā

vo mel-jol husn o basīrat meñ ab kahāñ

jo silsila thā phuul kā patthar se kaT gayā

maiñ dhuup kā hisār huuñ tū chhāñv kī fasīl

terā mirā hisāb barābar se kaT gayā

kitnā baḌā azaab hai bātin kī kashmakash

ā.īna sab kā garmī-e-jauhar se kaT gayā

sab apnī apnī zaat ke zindāñ meñ band haiñ

muddat huī ki rābta bāhar se kaT gayā

dekhā gayā na mujh se ma.ānī kā qatl-e-ām

chup-chāp maiñ hī lafzoñ ke lashkar se kaT gayā

us ke anā kī vaz.a thī sab se alag 'fazā'

kyā shaḳhs thā ki apne hī tevar se kaT gayā

achchha hua main waqt ke mehwar se kaT gaya

qatra guhar bana jo samundar se kaT gaya

zinda jo bach gae hain sahen nafraton ke dukh

apna gala to pyar ke KHanjar se kaT gaya

mausam bhi munfail hai bahut kya bharun uDan

rishta hawaon ka mere shahpar se kaT gaya

palkon par apni kaun mujhe ab sajaega

main hun wo rang jo tere paikar se kaT gaya

wo mel-jol husn o basirat mein ab kahan

jo silsila tha phul ka patthar se kaT gaya

main dhup ka hisar hun tu chhanw ki fasil

tera mera hisab barabar se kaT gaya

kitna baDa azab hai baatin ki kashmakash

aaina sab ka garmi-e-jauhar se kaT gaya

sab apni apni zat ke zindan mein band hain

muddat hui ki rabta bahar se kaT gaya

dekha gaya na mujh se maani ka qatl-e-am

chup-chap main hi lafzon ke lashkar se kaT gaya

us ke ana ki waza thi sab se alag 'faza'

kya shaKHs tha ki apne hi tewar se kaT gaya