ada pariyon ki surat hur ki aankhen ghazalon ki

adā pariyoñ kī sūrat huur kī āñkheñ ġhazāloñ kī

ġharaz māñge kī har ik chiiz hai in husn vāloñ kī

bajā.e-raqs mai-ḳhāne meñ hai gardish piyāloñ kī

takalluf-bar-taraf ye bazm hai allāh vāloñ kī

nishāñ jab miT gayā turbat kā aa.e fātiha paḌhne

unheñ kab yaad aa.ī haiñ vafā.eñ marne vāloñ kī

huā do gaz kafan mun'im ko hāsil māl-e-duniyā se

bañdhī rakkhī hī āḳhir rah ga.ī gaThrī doshāloñ kī

dukhā kar dil mirā phir aap hī uzr-e-jafā karnā

are kāfir tirī ik chaal hai ye laakh chāloñ kī

abhī tum ko bahut kuchh naaz hai tirchhī nigāhoñ par

magar dekhī nahīñ tāsīr tum ne mere nāloñ kī

tire hote hue ye baat ġhairat kī hai o zālim

uḌaa.e āsmāñ yuuñ ḳhaak terī pā.emāloñ kī

bhale haiñ yā bure jo kuchh haiñ bande to ḳhudā ke haiñ

nadāmat is qadar vā'iz na kar mai-ḳhāne vāloñ kī

huī bauchhār mujh par shikva-e-bejā kī phir kyā kyā

jahāñ chheḌā unheñ bas khul ga.ī gaThrī malāloñ kī

gunahgār-e-mohabbat haiñ jidhar guzreñge mahshar meñ

hamāre saath saath ik bhiiḌ hogī ḳhush-jamāloñ kī

farishtoñ se 'hafīz' ik din lahad meñ guftugū hogī

abhī se fikr lāzim hai tumheñ un ke savāloñ kī

ada pariyon ki surat hur ki aankhen ghazalon ki

gharaz mange ki har ek chiz hai in husn walon ki

bajae-raqs mai-KHane mein hai gardish piyalon ki

takalluf-bar-taraf ye bazm hai allah walon ki

nishan jab miT gaya turbat ka aae fatiha paDhne

unhen kab yaad aai hain wafaen marne walon ki

hua do gaz kafan mun'im ko hasil mal-e-duniya se

bandhi rakkhi hi aaKHir rah gai gaThri doshaalon ki

dukha kar dil mera phir aap hi uzr-e-jafa karna

are kafir teri ek chaal hai ye lakh chaalon ki

abhi tum ko bahut kuchh naz hai tirchhi nigahon par

magar dekhi nahin tasir tum ne mere nalon ki

tere hote hue ye baat ghairat ki hai o zalim

uDae aasman yun KHak teri paemalon ki

bhale hain ya bure jo kuchh hain bande to KHuda ke hain

nadamat is qadar wa'iz na kar mai-KHane walon ki

hui bauchhaar mujh par shikwa-e-beja ki phir kya kya

jahan chheDa unhen bas khul gai gaThri malalon ki

gunahgar-e-mohabbat hain jidhar guzrenge mahshar mein

hamare sath sath ek bhiD hogi KHush-jamalon ki

farishton se 'hafiz' ek din lahad mein guftugu hogi

abhi se fikr lazim hai tumhein un ke sawalon ki