ada se dekh lo jata rahe gila dil ka

adā se dekh lo jaatā rahe gila dil kā

bas ik nigāh pe Thahrā hai faisla dil kā

sitam vo tum ne kiye bhūle ham gila dil kā

huā tumhāre bigaḌne se faisla dil kā

bahār aate hī kunj-e-qafas nasīb huā

hazār haif ki niklā na jo sila dil kā

jo ye nishāna uḌā do to samjheñ tīr-fagan

bahut hai nāvak-e-mizhgāñ se fāsla dil kā

ilāhī ḳhair ho kuchh aaj rang be-Dhab hai

Tapak rahā hai ka.ī din se aabla dil kā

chalā hai chhoḌ ke tanhā kidhar tasavvur-e-yār

shab-e-firāq meñ thā tujh se mashġhala dil kā

vo riñd huuñ ki mujhe hathkaḌī se bai'at hai

balā hai gesū-e-jānāñ se silsila dil kā

phirā jo kūcha-e-kākul se koī pūchheñge

sunā hai luT gayā raste meñ qāfila dil kā

umīd-e-sub.h meñ kartā huuñ chaak dāman-e-shab

junūñ meñ roz nikālā hai mashġhala dil kā

vo zulm karte haiñ ham par to log kahte haiñ

ḳhudā bure se na Daale mu'āmla dil kā

hazār fasl-e-gul aa.e junūñ vo josh kahāñ

gayā shabāb ke hamrāh valvala dil kā

ḳhudā ke haath hai apnā ab ai 'qalaq' insāf

butoñ se hashr meñ hogā muqābla dil kā

ada se dekh lo jata rahe gila dil ka

bas ek nigah pe Thahra hai faisla dil ka

sitam wo tum ne kiye bhule hum gila dil ka

hua tumhaare bigaDne se faisla dil ka

bahaar aate hi kunj-e-qafas nasib hua

hazar haif ki nikla na jo sila dil ka

jo ye nishana uDa do to samjhen tir-fagan

bahut hai nawak-e-mizhgan se fasla dil ka

ilahi KHair ho kuchh aaj rang be-Dhab hai

Tapak raha hai kai din se aabla dil ka

chala hai chhoD ke tanha kidhar tasawwur-e-yar

shab-e-firaq mein tha tujh se mashghala dil ka

wo rind hun ki mujhe hathkaDi se bai'at hai

bala hai gesu-e-jaanan se silsila dil ka

phira jo kucha-e-kakul se koi puchhenge

suna hai luT gaya raste mein qafila dil ka

umid-e-subh mein karta hun chaak daman-e-shab

junun mein roz nikala hai mashghala dil ka

wo zulm karte hain hum par to log kahte hain

KHuda bure se na Dale mu'amla dil ka

hazar fasl-e-gul aae junun wo josh kahan

gaya shabab ke hamrah walwala dil ka

KHuda ke hath hai apna ab ai 'qalaq' insaf

buton se hashr mein hoga muqabla dil ka