ada shukr-e-KHuda kar gar tujhe paimana milta hai

adā shukr-e-ḳhudā kar gar tujhe paimāna miltā hai

baḌī mushkil se ai vaa.iz dar-e-mai-ḳhāna miltā hai

ham apne rāste meñ ka.aba-o-but-ḳhāna chhoḌ aa.e

chale jaate haiñ dekheñ kab dar-e-jānāna miltā hai

kisī bhī anjuman meñ jaa.eñ terā zikr sunte haiñ

kisī mahfil meñ bhī pahuñcheñ tirā afsāna miltā hai

samajh meñ kuchh nahīñ aatā ki ye kyā raaz hai yaaro

mizāj-e-sham.a se kyoñ kar dil-e-parvāna miltā hai

baḌī mushkil se hotā hai kahīñ 'iqbāl' sā paidā

ki sadiyoñ meñ kahīñ jā kar kabhī farzāna miltā hai

nazar vaale ko hai nazzāra-e-rū-e-butāñ hāsil

jabīñ vaale ko hī sang-e-dar-e-jānāna miltā hai

hameñ mai-ḳhāna-e-duniyā meñ kaafī ashk piine ko

jinheñ aañsū nahīñ milte unheñ paimāna miltā hai

tū un ke dar pe 'zāhid' aa gayā to sochtā kyā hai

jhukā de sar kahāñ sang-e-dar-e-jānāna miltā hai

ada shukr-e-KHuda kar gar tujhe paimana milta hai

baDi mushkil se ai waiz dar-e-mai-KHana milta hai

hum apne raste mein kaba-o-but-KHana chhoD aae

chale jate hain dekhen kab dar-e-jaanana milta hai

kisi bhi anjuman mein jaen tera zikr sunte hain

kisi mahfil mein bhi pahunchen tera afsana milta hai

samajh mein kuchh nahin aata ki ye kya raaz hai yaro

mizaj-e-shama se kyon kar dil-e-parwana milta hai

baDi mushkil se hota hai kahin 'iqbaal' sa paida

ki sadiyon mein kahin ja kar kabhi farzana milta hai

nazar wale ko hai nazzara-e-ru-e-butan hasil

jabin wale ko hi sang-e-dar-e-jaanana milta hai

hamein mai-KHana-e-duniya mein kafi ashk pine ko

jinhen aansu nahin milte unhen paimana milta hai

tu un ke dar pe 'zahid' aa gaya to sochta kya hai

jhuka de sar kahan sang-e-dar-e-jaanana milta hai