ada zaban se harf-e-nahin ziyaada hua

adā zabān se harf-e-nahīñ ziyāda huā

isī pe qatl mirā saarā ḳhānvāda huā

talab ne ziin sajā.ī kiran ke ghoḌe par

kabhī jo sair-e-mah-o-mahr kā irāda huā

hamīñ ne jast bharī vaqt ke samundar meñ

hamīñ se dāman-e-arz-o-samā kushāda huā

adū ne luuT lī maqtal meñ jab mirī poshāk

to merā ḳhuun mire jism kā libāda huā

adab kā ziina milā ziist kā qarīna milā

kahāñ kahāñ na tire ġham se istifāda huā

faras ko duur kiyā sar se taaj utaar diyā

tumhāre shahr meñ pahuñchā to maiñ piyāda huā

meñ dam-ba-ḳhud huuñ mire sar pe sā.ebān-e-falak

baġhair chob ke kyūñ-kar hai īstāda huā

ada zaban se harf-e-nahin ziyaada hua

isi pe qatl mera sara KHanwada hua

talab ne zin sajai kiran ke ghoDe par

kabhi jo sair-e-mah-o-mahr ka irada hua

hamin ne jast bhari waqt ke samundar mein

hamin se daman-e-arz-o-sama kushada hua

adu ne luT li maqtal mein jab meri poshak

to mera KHun mere jism ka libaada hua

adab ka zina mila zist ka qarina mila

kahan kahan na tere gham se istifada hua

faras ko dur kiya sar se taj utar diya

tumhaare shahr mein pahuncha to main piyaada hua

mein dam-ba-KHud hun mere sar pe saeban-e-falak

baghair chob ke kyun-kar hai istada hua