adawaton ka yun aaghaz-e-iKHtitam karen

adāvatoñ kā yuuñ āġhāz-e-iḳhtitām kareñ

adū mile to use ḳhair se salām kareñ

ab iḳhtiyār-e-tabaddul bhī ho gayā hāsil

to ab gulistāñ meñ raa.ij nayā nizām kareñ

hamārī aapsī ranjish hai chhoḌ deñ ham par

chaleñ huzūr chaleñ aap apnā kaam kareñ

ab us ke sāmne insāf kā tarāzū hai

unheñ kaheñ ki adālat kā ehtirām kareñ

safar nasīb jo sahrāoñ ke musāfir haiñ

vo log shahr meñ kis tarah ab qayām kareñ

vo jin buzurgoñ kā shafqat se haath ḳhālī ho

to un buzurgoñ kā ham kitnā ehtirām kareñ

badal rahī haiñ fazā.eñ to ḳhud ko bhī badleñ

kanīzeñ chhoḌiye āzād sab ġhulām kareñ

ḳhayāl rakkheñ mazīd aur koī dukh na mile

ab ahl-e-dard ye jiine kā ehtimām kareñ

adawaton ka yun aaghaz-e-iKHtitam karen

adu mile to use KHair se salam karen

ab iKHtiyar-e-tabaddul bhi ho gaya hasil

to ab gulistan mein raij naya nizam karen

hamari aapsi ranjish hai chhoD den hum par

chalen huzur chalen aap apna kaam karen

ab us ke samne insaf ka taraazu hai

unhen kahen ki adalat ka ehtiram karen

safar nasib jo sahraon ke musafir hain

wo log shahr mein kis tarah ab qayam karen

wo jin buzurgon ka shafqat se hath KHali ho

to un buzurgon ka hum kitna ehtiram karen

badal rahi hain fazaen to KHud ko bhi badlen

kanizen chhoDiye aazad sab ghulam karen

KHayal rakkhen mazid aur koi dukh na mile

ab ahl-e-dard ye jine ka ehtimam karen