adab se aari darinda-sifat logon mein

adab se aarī darinda-sifāt logoñ meñ

maiñ baiThtā hī nahīñ vāhiyāt logoñ meñ

nahīñ tavīl mire āshnāoñ kī fihrist

maiñ jaanā jaatā huuñ bas pāñch saat logoñ meñ

ḳhudā kā shukr suḳhan rā.egāñ nahīñ merā

sunī ga.ī hai mirī baat baat logoñ meñ

mujhe bhī chhoḌ ke jaanā hai ek roz jahāñ

mirā shumār bhī hai be-sabāt logoñ meñ

mujhe ḳhudā pe mukammal yaqīn hai mire dost

maiñ DhūñDhtā nahīñ rāh-e-najāt logoñ meñ

ye ishq maiñ ne chhupā kar kiyā thā so is kī

bayān kaise karūñ mushkilāt logoñ meñ

ye kyā banā huuñ mohabbat kā maiñ shajar sāhib

bikhar gayā hai mirā paat paat logoñ meñ

adab se aari darinda-sifat logon mein

main baiThta hi nahin wahiyat logon mein

nahin tawil mere aashnaon ki fihrist

main jaana jata hun bas panch sat logon mein

KHuda ka shukr suKHan raegan nahin mera

suni gai hai meri baat baat logon mein

mujhe bhi chhoD ke jaana hai ek roz jahan

mera shumar bhi hai be-sabaat logon mein

mujhe KHuda pe mukammal yaqin hai mere dost

main DhunDhta nahin rah-e-najat logon mein

ye ishq main ne chhupa kar kiya tha so is ki

bayan kaise karun mushkilat logon mein

ye kya bana hun mohabbat ka main shajar sahib

bikhar gaya hai mera pat pat logon mein