adu-e-bad-guman ki dastan kuchh aur kahi hai

adū-e-bad-gumāñ kī dāstāñ kuchh aur kahtī hai

magar terī nigāh-e-ḳhush-bayāñ kuchh aur kahtī hai

ḳhizāñ ke dam se apnī ḳhush-dilī kā hai bharam varna

bahār aate hī yād-e-āshiyāñ kuchh aur kahtī hai

suno dil se to phir har naġhma-e-ishrat ke parde meñ

alam kī dāstān-e-ḳhūñ-chakāñ kuchh aur kahtī hai

nazar un kī zabāñ un kī ta.ajjub hai ki is par bhī

nazar kuchh aur kahtī hai zabāñ kuchh aur kahtī hai

hazār andāz se ahl-e-havas ab daam phailā.eñ

navā-e-tā.ir-e-arsh āshiyāñ kuchh aur kahtī hai

tire lutf-o-karam kā mo'tarif hai ik jahāñ lekin

kisī majbūr-e-ġham kī dāstāñ kuchh aur kahtī hai

ḳhushā terī nazar kā imtiyāz-e-jalvat-o-ḳhalvat

vahāñ kuchh aur kahtī thī yahāñ kuchh aur kahtī hai

gulistāñ meñ bahār-e-gul-fashāñ aane se kyā hāsil

ki mustaqbil kī tasvīr-e-ḳhizāñ kuchh aur kahtī hai

vo mere haal par 'sāhir' kabhī jo muskurāte haiñ

to dil se apnī sa.i-e-rā.egāñ kuchh aur kahtī hai

adu-e-bad-guman ki dastan kuchh aur kahti hai

magar teri nigah-e-KHush-bayan kuchh aur kahti hai

KHizan ke dam se apni KHush-dili ka hai bharam warna

bahaar aate hi yaad-e-ashiyan kuchh aur kahti hai

suno dil se to phir har naghma-e-ishrat ke parde mein

alam ki dastan-e-KHun-chakan kuchh aur kahti hai

nazar un ki zaban un ki tajjub hai ki is par bhi

nazar kuchh aur kahti hai zaban kuchh aur kahti hai

hazar andaz se ahl-e-hawas ab dam phailaen

nawa-e-tair-e-arsh aashiyan kuchh aur kahti hai

tere lutf-o-karam ka mo'tarif hai ek jahan lekin

kisi majbur-e-gham ki dastan kuchh aur kahti hai

KHusha teri nazar ka imtiyaz-e-jalwat-o-KHalwat

wahan kuchh aur kahti thi yahan kuchh aur kahti hai

gulistan mein bahaar-e-gul-fashan aane se kya hasil

ki mustaqbil ki taswir-e-KHizan kuchh aur kahti hai

wo mere haal par 'sahir' kabhi jo muskuraate hain

to dil se apni sai-e-raegan kuchh aur kahti hai