adu ho gaya aadmi aadmi ka

adū ho gayā aadmī aadmī kā

ajab daur hai ye na.ī raushnī kā

ulajhte haiñ naslī-tanāfur meñ insāñ

miTā kar na rakh deñ ye naam aadmī kā

bas ik saañs hai aa.e aa.e na aa.e

bharosā nahīñ hai koī zindagī kā

kudūrat ko chhoḌo mohabbat baḌhāo

ye duniyā hai mela ghaḌī do ghaḌī kā

farishtoñ se nisbat mujhe dene vaalo

nahīñ jānte tum maqām aadmī kā

ġham-e-lā-zavāl ik atā kar ke mujh ko

adā kar diyā tū ne haq dostī kā

jo saaqī kī ḳhātir hī pī luuñ to pī luuñ

nahīñ shauq varna mujhe mai-kashī kā

baḌī chiiz hai mehr-o-ulfat bhī 'sābir'

isī meñ hai poshīda gauhar ḳhushī kā

adu ho gaya aadmi aadmi ka

ajab daur hai ye nai raushni ka

ulajhte hain nasli-tanafur mein insan

miTa kar na rakh den ye nam aadmi ka

bas ek sans hai aae aae na aae

bharosa nahin hai koi zindagi ka

kudurat ko chhoDo mohabbat baDhao

ye duniya hai mela ghaDi do ghaDi ka

farishton se nisbat mujhe dene walo

nahin jaante tum maqam aadmi ka

gham-e-la-zawal ek ata kar ke mujh ko

ada kar diya tu ne haq dosti ka

jo saqi ki KHatir hi pi lun to pi lun

nahin shauq warna mujhe mai-kashi ka

baDi chiz hai mehr-o-ulfat bhi 'sabir'

isi mein hai poshida gauhar KHushi ka