afsana mere dil ka dil-azar se kah do

afsāna mire dil kā dil-āzār se kah do

bulbul ke zarā dard ko gulzār se kah do

saudā-e-mohabbat ne kiyā hai mujhe majnūñ

jā silsila-e-gesū-e-dildār se kah do

mujh tishna-e-dīdār kī hai hoñToñ pe ab jaan

lillāh ye chāh-e-zaqan-e-yār se kah do

gardan pe mirī sar ye bahut bār-e-garāñ hai

teġh-e-do-dam-e-abru-e-ḳhamdār se kah do

us chashm se kah do mirī rañjūrī kī hālat

paiġhām ye bīmār kā bīmār se kah do

huuñ banda-e-ulfat nahīñ maz.hab kī hai ḳhvāhish

ye haal mirā sub.ha-o-zunnār se kah do

mansūr-sifat dil se nikaltā hai anal-haq

ye haal mirā jald sar-e-dār se kah do

mizhgān-e-sitamgar ne kiyā mujh ko hai bismil

e.ajāz-e-masīhā-e-lab-e-yār se kah do

'āsim' hī huā kāfir-e-ishq-e-shah-e-ḳhādim

is ramz ko har sāhab-e-asrār se kah do

afsana mere dil ka dil-azar se kah do

bulbul ke zara dard ko gulzar se kah do

sauda-e-mohabbat ne kiya hai mujhe majnun

ja silsila-e-gesu-e-dildar se kah do

mujh tishna-e-didar ki hai honTon pe ab jaan

lillah ye chah-e-zaqan-e-yar se kah do

gardan pe meri sar ye bahut bar-e-garan hai

tegh-e-do-dam-e-abru-e-KHamdar se kah do

us chashm se kah do meri ranjuri ki haalat

paigham ye bimar ka bimar se kah do

hun banda-e-ulfat nahin mazhab ki hai KHwahish

ye haal mera subha-o-zunnar se kah do

mansur-sifat dil se nikalta hai anal-haq

ye haal mera jald sar-e-dar se kah do

mizhgan-e-sitamgar ne kiya mujh ko hai bismil

eajaz-e-masiha-e-lab-e-yar se kah do

'asim' hi hua kafir-e-ishq-e-shah-e-KHadim

is ramz ko har sahab-e-asrar se kah do