afsos ki dandan ka kiya rizq falak ne

afsos ki dandāñ kā kiyā rizq falak ne

jin logoñ kī thī dar-ḳhur-e-aqd-e-guhar añgusht

kaafī hai nishānī tirā chhalle kā na denā

ḳhālī mujhe dikhlā ke ba-vaqt-e-safar añgusht

likhtā huuñ 'asad' sozish-e-dil se suḳhan-e-garm

tā rakh na sake koī mire harf par añgusht

jaatā huuñ jidhar sab kī uThe hai udhar añgusht

yak-dast jahāñ mujh se phirā hai magar añgusht

mizhgāñ kī mohabbat meñ jo añgusht-numā huuñ

lagtī hai mujhe tiir ke mānind har añgusht

har ġhuncha-e-gul sūrat-e-yak-qatra-e-ḳhūñ hai

dekhā hai kisū kā jo hinā-basta sar-e-añgusht

garmī hai zabāñ kī sabab-e-soḳhtan-e-jāñ

har sham' shahādat ko hai yaañ sar-basar añgusht

ḳhuuñ dil meñ jo mere nahīñ baaqī to 'ajab kyā

juuñ māhī-e-be-āb taḌaptī hai har añgusht

shoḳhī tirī kah detī hai ahvāl hamārā

rāz-e-dil-e-sad-pāra kī hai parda dar-e-añgusht

kis rutba meñ bārīkī-o-narmī hai ki juuñ gul

aatī nahīñ panja meñ bas is ke nazar añgusht

maiñ ulfat-e-mizhgāñ meñ jo añgusht numā huuñ

lagtī hai mujhe tiir ke mānind har añgusht

afsos ki dandan ka kiya rizq falak ne

jin logon ki thi dar-KHur-e-aqd-e-guhar angusht

kafi hai nishani tera chhalle ka na dena

KHali mujhe dikhla ke ba-waqt-e-safar angusht

likhta hun 'asad' sozish-e-dil se suKHan-e-garm

ta rakh na sake koi mere harf par angusht

jata hun jidhar sab ki uThe hai udhar angusht

yak-dast jahan mujh se phira hai magar angusht

mizhgan ki mohabbat mein jo angusht-numa hun

lagti hai mujhe tir ke manind har angusht

har ghuncha-e-gul surat-e-yak-qatra-e-KHun hai

dekha hai kisu ka jo hina-basta sar-e-angusht

garmi hai zaban ki sabab-e-soKHtan-e-jaan

har sham' shahadat ko hai yan sar-basar angusht

KHun dil mein jo mere nahin baqi to 'ajab kya

jun mahi-e-be-ab taDapti hai har angusht

shoKHi teri kah deti hai ahwal hamara

raaz-e-dil-e-sad-para ki hai parda dar-e-angusht

kis rutba mein bariki-o-narmi hai ki jun gul

aati nahin panja mein bas is ke nazar angusht

main ulfat-e-mizhgan mein jo angusht numa hun

lagti hai mujhe tir ke manind har angusht