afsurdagi-e-dil se ye rang hai suKHan mein

afsurdagi-e-dil se ye rang hai suḳhan meñ

yā'nī ḳhizāñ-rasīda kuchh phuul haiñ chaman meñ

ġhurbat meñ bhī rahe ham yāroñ kī anjuman meñ

yād-e-vatan ne rakkhā aksar hameñ vatan meñ

kyā saañs kā bharosā phir aa.e yā na aa.e

kab tak jalegī āḳhir ye sham' anjuman meñ

lākhoñ meñ ek niklī vaz-e-junūñ bhī apnī

ab bhī rahe na dab kar ham un se bāñkpan meñ

kyā jaane kyā vahāñ se laayā ḳhushī kā muzhda

phūlā nahīñ samātā qāsid jo pairahan meñ

jo chāhte haiñ rāhat likkheñ vo hāl-e-ġhurbat

ham nañg jānte haiñ ḳhat bhejnā vatan meñ

shāyad kuchh amn paañv hāthoñ se āsmāñ ke

ḳhaak us galī kī le kar malnā mire kafan meñ

go pīr-zan hai muḳhbir baa.is to hai ye āḳhir

ālūda dast-e-shīrīñ hai ḳhūn-e-kohkan meñ

ham mai-kashoñ ko pī kar ye infi.āl aayā

ra.asha paḌā huā hai ek ek uzv-e-tan meñ

ḳhāna-ḳharābī apnī yaad aa.ī jī bhar aayā

ujḌā huā jo dekhā ik āshiyāñ chaman meñ

vaa.iz tirī zabāñ se ġhībat butoñ kī sun kar

masjid se uTh ke pahuñche ham dair-e-barhaman meñ

vo dil meñ aur dil hai sau hasratoñ kā maskan

ḳhalvat meñ anjuman hai ḳhalvat hai anjuman meñ

shā'ir 'hafīz' tum se kāmil bahut haiñ lekin

kahte haiñ dard aisā paidā kahāñ suḳhan meñ

afsurdagi-e-dil se ye rang hai suKHan mein

ya'ni KHizan-rasida kuchh phul hain chaman mein

ghurbat mein bhi rahe hum yaron ki anjuman mein

yaad-e-watan ne rakkha aksar hamein watan mein

kya sans ka bharosa phir aae ya na aae

kab tak jalegi aaKHir ye sham' anjuman mein

lakhon mein ek nikli waz-e-junun bhi apni

ab bhi rahe na dab kar hum un se bankpan mein

kya jaane kya wahan se laya KHushi ka muzhda

phula nahin samata qasid jo pairahan mein

jo chahte hain rahat likkhen wo haal-e-ghurbat

hum nang jaante hain KHat bhejna watan mein

shayad kuchh amn panw hathon se aasman ke

KHak us gali ki le kar malna mere kafan mein

go pir-zan hai muKHbir bais to hai ye aaKHir

aaluda dast-e-shirin hai KHun-e-kohkan mein

hum mai-kashon ko pi kar ye infial aaya

rasha paDa hua hai ek ek uzw-e-tan mein

KHana-KHarabi apni yaad aai ji bhar aaya

ujDa hua jo dekha ek aashiyan chaman mein

waiz teri zaban se ghibat buton ki sun kar

masjid se uTh ke pahunche hum dair-e-barhaman mein

wo dil mein aur dil hai sau hasraton ka maskan

KHalwat mein anjuman hai KHalwat hai anjuman mein

sha'ir 'hafiz' tum se kaamil bahut hain lekin

kahte hain dard aisa paida kahan suKHan mein