agar allah ki wahdaniyat taslim karte ho

agar allāh kī vahdāniyat taslīm karte ho

to phir insān ko ḳhānoñ meñ kyuuñ taqsīm karte ho

mohabbat dastaras se lafz-o-ma.anī kī hai bālā-tar

miyāñ tum us kī bhī tashrīh aur tafhīm karte ho

tumhārā qaul kyūñkar mo'atabar Thahre ki tum us meñ

kabhī tansīḳh karte ho kabhī tarmīm karte ho

haqīr un ko samajhte ho jo haiñ tauqīr ke qābil

razīloñ kī magar tāzīm aur takrīm karte ho

baġhāvat kyuuñ nahīñ karte ḳhudā-vandān-e-bātil se

ḳhudā bar-haq hai is haq ko agar taslīm karte ho

agar qaabū nahīñ ḳhud par to sab be-sūd-o-lā-hāsil

bahādur laakh ho tasḳhīr haf-iqlīm karte ho

in āvāra parindoñ ko pakaḌ paate ho tum kyūñkar

ḳhayāloñ kī ai 'rāhī' kis tarah tanzīm karte ho

agar allah ki wahdaniyat taslim karte ho

to phir insan ko KHanon mein kyun taqsim karte ho

mohabbat dastaras se lafz-o-mani ki hai baala-tar

miyan tum us ki bhi tashrih aur tafhim karte ho

tumhaara qaul kyunkar mo'atabar Thahre ki tum us mein

kabhi tansiKH karte ho kabhi tarmim karte ho

haqir un ko samajhte ho jo hain tauqir ke qabil

razilon ki magar tazim aur takrim karte ho

baghawat kyun nahin karte KHuda-wandan-e-baatil se

KHuda bar-haq hai is haq ko agar taslim karte ho

agar qabu nahin KHud par to sab be-sud-o-la-hasil

bahadur lakh ho tasKHir haf-iqlim karte ho

in aawara parindon ko pakaD pate ho tum kyunkar

KHayalon ki ai 'rahi' kis tarah tanzim karte ho