agar chaman ka koi dar khula bhi mere liye

agar chaman kā koī dar khulā bhī mere liye

sumūm ban ga.ī bād-e-sabā bhī mere liye

mirā suḳhan bhī huā us ke naam se mausūm

abas huā mirā apnā kahā bhī mere liye

yahī nahīñ ki vo raste se moḌ kaaT gayā

na chhoḌā us ne koī naqsh-e-pā bhī mere liye

ta.alluqāt kā rakhnā bhī toḌnā bhī muhāl

azāb-e-jāñ hai ye rasm-e-vafā bhī mere liye

mujhe tavīl safar kā milā thā hukm to phir

kuchh aur hotī kushāda fazā bhī mere liye

mire liye jo hai zanjīr merā auj-e-nazar

kamand hai mirī fikr-e-rasā bhī mere liye

davā hai mere liye jis kī ḳhāk-e-pā 'mohsin'

usī kā ism hai harf-e-duā bhī mere liye

agar chaman ka koi dar khula bhi mere liye

sumum ban gai baad-e-saba bhi mere liye

mera suKHan bhi hua us ke nam se mausum

abas hua mera apna kaha bhi mere liye

yahi nahin ki wo raste se moD kaT gaya

na chhoDa us ne koi naqsh-e-pa bhi mere liye

talluqat ka rakhna bhi toDna bhi muhaal

azab-e-jaan hai ye rasm-e-wafa bhi mere liye

mujhe tawil safar ka mila tha hukm to phir

kuchh aur hoti kushada faza bhi mere liye

mere liye jo hai zanjir mera auj-e-nazar

kamand hai meri fikr-e-rasa bhi mere liye

dawa hai mere liye jis ki KHak-e-pa 'mohsin'

usi ka ism hai harf-e-dua bhi mere liye