agar dil waqif-e-nairangi-e-tab-e-sanam hota

agar dil vāqif-e-nairañgī-e-tab-e-sanam hotā

zamāne kī do-rañgī kā use hargiz na ġham hotā

ye pāband-e-musībat dil ke hāthoñ ham to rahte haiñ

nahīñ to chain se kaTtī na dil hotā na ġham hotā

unhīñ kī be-vafā.ī kā ye hai āThoñ-pahar sadma

vahī hote jo qaabū meñ to phir kaahe ko ġham hotā

lab-o-chashm-e-sanam gar dekhne paate kahīñ shā.ir

koī shīrīñ-suḳhan hotā koī jādū-raqam hotā

bahut achchhā huā aa.e na vo merī ayādat ko

jo vo aate to ġhair aate jo ġhair aate to ġham hotā

agar qabreñ nazar ātīñ na dārā-o-sikandar kī

mujhe bhī ishtiyāq-e-daulat-o-jāh-o-hasham hotā

liye jaatā hai josh-e-shauq ham ko rāh-e-ulfat meñ

nahīñ to zo.af se dushvār chalnā do-qadam hotā

na rahne paa.e dīvāroñ meñ rauzan shukr hai varna

tumheñ to dil-lagī hotī ġharīboñ par sitam hotā

agar dil waqif-e-nairangi-e-tab-e-sanam hota

zamane ki do-rangi ka use hargiz na gham hota

ye paband-e-musibat dil ke hathon hum to rahte hain

nahin to chain se kaTti na dil hota na gham hota

unhin ki be-wafai ka ye hai aaThon-pahar sadma

wahi hote jo qabu mein to phir kahe ko gham hota

lab-o-chashm-e-sanam gar dekhne pate kahin shair

koi shirin-suKHan hota koi jadu-raqam hota

bahut achchha hua aae na wo meri ayaadat ko

jo wo aate to ghair aate jo ghair aate to gham hota

agar qabren nazar aatin na dara-o-sikandar ki

mujhe bhi ishtiyaq-e-daulat-o-jah-o-hasham hota

liye jata hai josh-e-shauq hum ko rah-e-ulfat mein

nahin to zoaf se dushwar chalna do-qadam hota

na rahne pae diwaron mein rauzan shukr hai warna

tumhein to dil-lagi hoti gharibon par sitam hota