agar ghaflat se baz aaya jafa ki

agar ġhaflat se baaz aayā jafā kī

talāfī kī bhī zālim ne to kyā kī

mare āġhāz-e-ulfat meñ ham afsos

use bhī rah ga.ī hasrat jafā kī

kabhī insāf hī dekhā na dīdār

qayāmat aksar us kū meñ rahā kī

falak ke haath se maiñ jā chhupūñ gar

ḳhabar lā de koī tahtus-sarā kī

shab-e-vasl-e-adū kyā kyā jalā huuñ

haqīqat khul ga.ī roz-e-jazā kī

chaman meñ koī us kū se na aayā

ga.ī barbād sab mehnat sabā kī

kushād-e-dil pe bāñdhī hai kamar aaj

nahīñ hai ḳhairiyat band-e-qabā kī

kiyā jab iltifāt us ne zarā sā

paḌī ham ko husūl-e-mudda.ā kī

kahā hai ġhair ne tum se mirā haal

kahe detī hai bebākī adā kī

tumheñ shor-e-fuġhāñ se mere kyā kaam

ḳhabar lo apnī chashm-e-surma-sā kī

diyā ilm o hunar hasrat-kashī ko

falak ne mujh se ye kaisī daġhā kī

ġham-e-maqsad-rasī tā naza.a aur ham

ab aa.ī maut baḳht-e-nā-rasā kī

mujhe ai dil tirī jaldī ne maarā

nahīñ taqsīr us der-āshnā kī

jafā se thak ga.e to bhī na pūchhā

ki tū ne kis tavaqqo par vafā kī

kahā us but se martā huuñ to 'momin'

kahā maiñ kyā karūñ marzī ḳhudā kī

agar ghaflat se baz aaya jafa ki

talafi ki bhi zalim ne to kya ki

mare aaghaz-e-ulfat mein hum afsos

use bhi rah gai hasrat jafa ki

kabhi insaf hi dekha na didar

qayamat aksar us ku mein raha ki

falak ke hath se main ja chhupun gar

KHabar la de koi tahtus-sara ki

shab-e-wasl-e-adu kya kya jala hun

haqiqat khul gai roz-e-jaza ki

chaman mein koi us ku se na aaya

gai barbaad sab mehnat saba ki

kushad-e-dil pe bandhi hai kamar aaj

nahin hai KHairiyat band-e-qaba ki

kiya jab iltifat us ne zara sa

paDi hum ko husul-e-muddaa ki

kaha hai ghair ne tum se mera haal

kahe deti hai bebaki ada ki

tumhein shor-e-fughan se mere kya kaam

KHabar lo apni chashm-e-surma-sa ki

diya ilm o hunar hasrat-kashi ko

falak ne mujh se ye kaisi dagha ki

gham-e-maqsad-rasi ta naza aur hum

ab aai maut baKHt-e-na-rasa ki

mujhe ai dil teri jaldi ne mara

nahin taqsir us der-ashna ki

jafa se thak gae to bhi na puchha

ki tu ne kis tawaqqo par wafa ki

kaha us but se marta hun to 'momin'

kaha main kya karun marzi KHuda ki