agar in bazuon mein dam nahin hai

agar in bāzūoñ meñ dam nahīñ hai

to gulshan bhī qafas se kam nahīñ hai

mire sāz-e-junūñ ke chheḌne ko

kalī kā ik tabassum kam nahīñ hai

mujhe duniyā mire aalam meñ dekhe

har-ik aalam mirā aalam nahīñ hai

na de mujh ko fareb-e-ishq duniyā

fareb-e-zindagī kuchh kam nahīñ hai

ġham-e-tauhīn-e-mai-ḳhāna hai 'shārib'

mujhe tishna-labī kā ġham nahīñ hai

agar in bazuon mein dam nahin hai

to gulshan bhi qafas se kam nahin hai

mere saz-e-junun ke chheDne ko

kali ka ek tabassum kam nahin hai

mujhe duniya mere aalam mein dekhe

har-ik aalam mera aalam nahin hai

na de mujh ko fareb-e-ishq duniya

fareb-e-zindagi kuchh kam nahin hai

gham-e-tauhin-e-mai-KHana hai 'shaarib'

mujhe tishna-labi ka gham nahin hai