agar kabhi tere aazar se nikalta hun

agar kabhī tire āzār se nikaltā huuñ

to apne dā.era-e-kār se nikaltā huuñ

havā-e-tāza huuñ ruknā nahīñ kahīñ bhī mujhe

gharoñ meñ ghustā huuñ ashjār se nikaltā huuñ

kabhī hai us ke mazāfāt meñ numūd mirī

kabhī maiñ apne hī āsār se nikaltā huuñ

maiñ ghar meñ jab nahīñ hotā to ghaas kī sūrat

darīcha o dar-o-dīvār se nikaltā huuñ

isī kināra-e-dariyā-e-zāt par har-dam

ġhurūb hotā huuñ us paar se nikaltā huuñ

vidā.a kartī hai rozāna zindagī mujh ko

maiñ roz maut ke mañjdhār se nikaltā huuñ

rukā huā koī sailāb huuñ tabī.at kā

hamesha tundi-e-raftār se nikaltā huuñ

ise bhī kuchh mirī himmat hī jāniye jo kabhī

ḳhayāl-o-ḳhvāb ke ambār se nikaltā huuñ

libās bechtā huuñ jā ke pahle apnā 'zafar'

to kuchh ḳharīd ke bāzār se nikaltā huuñ

agar kabhi tere aazar se nikalta hun

to apne daera-e-kar se nikalta hun

hawa-e-taza hun rukna nahin kahin bhi mujhe

gharon mein ghusta hun ashjar se nikalta hun

kabhi hai us ke mazafat mein numud meri

kabhi main apne hi aasar se nikalta hun

main ghar mein jab nahin hota to ghas ki surat

daricha o dar-o-diwar se nikalta hun

isi kinara-e-dariya-e-zat par har-dam

ghurub hota hun us par se nikalta hun

widaa karti hai rozana zindagi mujh ko

main roz maut ke manjdhaar se nikalta hun

ruka hua koi sailab hun tabiat ka

hamesha tundi-e-raftar se nikalta hun

ise bhi kuchh meri himmat hi jaaniye jo kabhi

KHayal-o-KHwab ke ambar se nikalta hun

libas bechta hun ja ke pahle apna 'zafar'

to kuchh KHarid ke bazar se nikalta hun