agar KHushi mein tujhe gungunane lagte hain

agar ḳhushī meñ tujhe gungunāne lagte haiñ

to log shahr se aañsū bahāne lagte haiñ

nikal ke aañkh se lafzoñ meñ aane lagte haiñ haiñ

miyāñ ye ashk haiñ yūñhī Thikāne lagte haiñ

guzar chuke haiñ kisī aks kī ma.ayyat meñ

ham aise log jo ā.īna-ḳhāne lagte haiñ

to karne lagte haiñ ġhusl-e-talāsh-e-misrā-e-nau

ham apne aap ko jab bhī purāne lagte haiñ

baġhaur dekheñ to yak-jast fāsle pe hai tū

lagānā chāheñ to sadiyāñ zamāne lagte haiñ

shajar huuñ aur parindoñ se hai bahār mirī

ye mujh pe aa.eñ to phal-phūl aane lagte haiñ

kareñ to kyā hameñ amboh-e-ḳhvāb roktā hai

kabhī jo so.e huoñ ko jagāne lagte haiñ

ham aa.ine meñ tirā aks dekhne ke liye

ka.ī charāġh nadī meñ bahāne lagte haiñ

agar KHushi mein tujhe gungunane lagte hain

to log shahr se aansu bahane lagte hain

nikal ke aankh se lafzon mein aane lagte hain hain

miyan ye ashk hain yunhi Thikane lagte hain

guzar chuke hain kisi aks ki mayyat mein

hum aise log jo aaina-KHane lagte hain

to karne lagte hain ghusl-e-talash-e-misra-e-nau

hum apne aap ko jab bhi purane lagte hain

baghaur dekhen to yak-jast fasle pe hai tu

lagana chahen to sadiyan zamane lagte hain

shajar hun aur parindon se hai bahaar meri

ye mujh pe aaen to phal-phul aane lagte hain

karen to kya hamein amboh-e-KHwab rokta hai

kabhi jo soe huon ko jagane lagte hain

hum aaine mein tera aks dekhne ke liye

kai charagh nadi mein bahane lagte hain