agar sham hue to gal gae hum

agar sham' hue to gal ga.e ham

jo parvāna hue to jal ga.e ham

paḌe aa kar falak ke āsiyā meñ

misāl-e-dāna haa.e dil ga.e ham

kisī sūrat na paayā ham ne ārām

yahāñ se vaañ ke ta.iiñ be-kal ga.e ham

na yaañ se le ga.e na vaañ se laa.e

kaf-e-afsos nāhaq mal ga.e ham

tilismāt-e-jahāñ kā dekh zāhir

taraf mā'nī ke ab ojhal ga.e ham

chale aa.e the tārīkī se lekin

pa chalte vaqt le mash'al ga.e ham

na aayā haath vo dair-o-haram meñ

milā jab dil ke dar-mandal ga.e ham

agar samjhoge mā'nī shaiḳh sāhab

ga.e par tum ko kar qaa.il ga.e ham

rahegā naam 'afrīdī' kā tā-hashr

hameñ the jo ki lā-tā.il ga.e ham

agar sham' hue to gal gae hum

jo parwana hue to jal gae hum

paDe aa kar falak ke aasiya mein

misal-e-dana hae dil gae hum

kisi surat na paya hum ne aaram

yahan se wan ke tain be-kal gae hum

na yan se le gae na wan se lae

kaf-e-afsos nahaq mal gae hum

tilismat-e-jahan ka dekh zahir

taraf ma'ni ke ab ojhal gae hum

chale aae the tariki se lekin

pa chalte waqt le mash'al gae hum

na aaya hath wo dair-o-haram mein

mila jab dil ke dar-mandal gae hum

agar samjhoge ma'ni shaiKH sahab

gae par tum ko kar qail gae hum

rahega nam 'afridi' ka ta-hashr

hamein the jo ki la-tail gae hum