agar tujhse hun to phir aur kya hun

agar tujh se huuñ to phir aur kyā huuñ

maiñ kis jaisā huuñ kis kis se judā huuñ

mujhe ma.alūm hai kitnā burā huuñ

ye kyā kam hai ki apnā aa.ina huuñ

koī dīvār sī TuuTī hai shāyad

maiñ andar hī kahīñ girne lagā huuñ

kabhī to sāmne ā.ūñgā apne

ki apnī raah meñ kab se khaḌā huuñ

mujhe ehsās ne gherā huā hai

maiñ apne-āp apnā dā.era huuñ

ye merā haath kis ke haath meñ hai

ye kis ke paañv haiñ jin par khaḌā huuñ

mire alfāz patthar ho ga.e haiñ

maiñ apne haath se zaḳhmī huā huuñ

ḳhud apne-āp ko āvāz de kar

na jaane 'ashk' kis ko DhūñDhtā huuñ

agar tujh se hun to phir aur kya hun

main kis jaisa hun kis kis se juda hun

mujhe malum hai kitna bura hun

ye kya kam hai ki apna aaina hun

koi diwar si TuTi hai shayad

main andar hi kahin girne laga hun

kabhi to samne aaunga apne

ki apni rah mein kab se khaDa hun

mujhe ehsas ne ghera hua hai

main apne-ap apna daera hun

ye mera hath kis ke hath mein hai

ye kis ke panw hain jin par khaDa hun

mere alfaz patthar ho gae hain

main apne hath se zaKHmi hua hun

KHud apne-ap ko aawaz de kar

na jaane 'ashk' kis ko DhunDhta hun