agar wo apne hasin chehre ko bhul kar be-naqab kar de

agar vo apne hasīn chehre ko bhuul kar be-naqāb kar de

to zarre ko māhtāb aur māhtāb ko āftāb kar de

tirī mohabbat kī vādiyoñ meñ mirī javānī se duur kyā hai

jo saada paanī ko ik nashīlī nazar meñ rangīñ sharāb kar de

harīm-e-ishrat meñ sone vaale shamīm-e-gesū kī mastiyoñ se

mirī javānī kī saada rātoñ ko ab to sarshār ḳhvāb kar de

maze vo paa.e haiñ aarzū meñ ki dil kī ye aarzū hai yārab

tamām duniyā kī ārzūeñ mire liye intiḳhāb kar de

nazar nā aane pe hai ye hālat ki jang hai shaiK-o-barhaman meñ

ḳhabar nahīñ kyā se kyā ho duniyā jo ḳhud ko vo be-naqāb kar de

mire gunāhoñ kī shorisheñ is liye ziyāda rahī haiñ yārab

ki in kī gustāḳhiyoñ se tū apne afv ko be-hisāb kar de

ḳhudā na laa.e vo din ki terī sunahrī nīñdoñ meñ farq aa.e

mujhe to yuuñ apne hijr meñ 'umr bhar ko bezār-e-ḳhvāb kar de

maiñ jān-o-dil se tasavvur-e-husn-e-dost kī mastiyoñ ke qurbāñ

jo ik nazar meñ kisī ke be-kaif āñsuoñ ko sharāb kar de

urūs-e-fitrat kā ek khoyā huā tabassum hai jis ko 'aḳhtar'

kahīñ vo chāhe sharāb kar de kahīñ vo chāhe shabāb kar de

agar wo apne hasin chehre ko bhul kar be-naqab kar de

to zarre ko mahtab aur mahtab ko aaftab kar de

teri mohabbat ki wadiyon mein meri jawani se dur kya hai

jo sada pani ko ek nashili nazar mein rangin sharab kar de

harim-e-ishrat mein sone wale shamim-e-gesu ki mastiyon se

meri jawani ki sada raaton ko ab to sarshaar KHwab kar de

maze wo pae hain aarzu mein ki dil ki ye aarzu hai yarab

tamam duniya ki aarzuen mere liye intiKHab kar de

nazar na aane pe hai ye haalat ki jang hai shaiK-o-barhaman mein

KHabar nahin kya se kya ho duniya jo KHud ko wo be-naqab kar de

mere gunahon ki shorishen is liye ziyaada rahi hain yarab

ki in ki gustaKHiyon se tu apne afw ko be-hisab kar de

KHuda na lae wo din ki teri sunahri nindon mein farq aae

mujhe to yun apne hijr mein 'umr bhar ko bezar-e-KHwab kar de

main jaan-o-dil se tasawwur-e-husn-e-dost ki mastiyon ke qurban

jo ek nazar mein kisi ke be-kaif aansuon ko sharab kar de

urus-e-fitrat ka ek khoya hua tabassum hai jis ko 'aKHtar'

kahin wo chahe sharab kar de kahin wo chahe shabab kar de