agarche aankh bahut shoKHiyon ki zad mein rahi

agarche aañkh bahut shoḳhiyoñ kī zad meñ rahī

mirī nigāh hamesha adab kī had meñ rahī

samajh sakā na koī zindagī kī arzish ko

ye jins-e-ḳhās trāzū-e-nek-o-bad meñ rahī

bahut buland huā tamkanat se tāj-e-shahī

kulāh-e-faqr magar nāzish-e-namad meñ rahī

hamesha dard se aarī rahā ye zāhid-e-ḳhushk

ye na.ash zinda sadā goshā-e-lahad meñ rahī

diloñ meñ baiTh gayā barhaman kā husn-e-bayāñ

hadīs-e-shaiḳh tilismāt-e-radd-o-kad meñ rahī

agarche aankh bahut shoKHiyon ki zad mein rahi

meri nigah hamesha adab ki had mein rahi

samajh saka na koi zindagi ki arzish ko

ye jins-e-KHas traazu-e-nek-o-bad mein rahi

bahut buland hua tamkanat se taj-e-shahi

kulah-e-faqr magar nazish-e-namad mein rahi

hamesha dard se aari raha ye zahid-e-KHushk

ye nash zinda sada gosha-e-lahad mein rahi

dilon mein baiTh gaya barhaman ka husn-e-bayan

hadis-e-shaiKH tilismat-e-radd-o-kad mein rahi