agarche mujhko judai teri gawara nahin

agarche mujh ko judā.ī tirī gavārā nahīñ

sivā.e is ke magar aur koī chāra nahīñ

ḳhushī se kaun bhulātā hai apne pyāroñ ko

qusūr is meñ zamāne kā hai tumhārā nahīñ

tumhāre zikr se yaad aa.e kyā ghaTā ke sivā

hamāre paas koī aur isti.ārā nahīñ

ye iltifāt kī bhiik apne paas rahne de

tire faqīr ne dāman kabhī pasārā nahīñ

mirā to sirf bhañvar tak safīna pahuñchā hai

tujhe to Dūbne vāloñ ne bhī pukārā nahīñ

har ek rabt tire vāste se thā varna

bhare jahāñ meñ koī āshnā hamārā nahīñ

jo terī diid ne baḳhshe vahī haiñ zaḳhm bahut

ab apne dil meñ koī hasrat-e-nazāra nahīñ

banā sakūñ jise jhūmar tumhāre māthe kā

falak pe aaj bhī aisā koī sitārā nahīñ

chalā.e jaao 'qatīl' apnā kārobār-e-vafā

jo is meñ jaan bhī jaa.e to kuchh ḳhasārā nahīñ

agarche mujh ko judai teri gawara nahin

siwae is ke magar aur koi chaara nahin

KHushi se kaun bhulata hai apne pyaron ko

qusur is mein zamane ka hai tumhaara nahin

tumhaare zikr se yaad aae kya ghaTa ke siwa

hamare pas koi aur istiara nahin

ye iltifat ki bhik apne pas rahne de

tere faqir ne daman kabhi pasara nahin

mera to sirf bhanwar tak safina pahuncha hai

tujhe to Dubne walon ne bhi pukara nahin

har ek rabt tere waste se tha warna

bhare jahan mein koi aashna hamara nahin

jo teri did ne baKHshe wahi hain zaKHm bahut

ab apne dil mein koi hasrat-e-nazara nahin

bana sakun jise jhumar tumhaare mathe ka

falak pe aaj bhi aisa koi sitara nahin

chalae jao 'qatil' apna karobar-e-wafa

jo is mein jaan bhi jae to kuchh KHasara nahin