agla sa kyon wo walwala-e-dil nahin raha

aglā sā kyoñ vo valvala-e-dil nahīñ rahā

kyoñ shauq-e-sair-e-kūcha-e-qātil nahīñ rahā

ab kyoñ vabāl-e-jān huī jā rahī hai ziist

kyā ab tire sitam ke bhī qābil nahīñ rahā

me.ār-e-husn-o-ishq kī pastī ko dekh kar

apnā to dil lagāne kā ab dil nahīñ rahā

aisā bhī ho kisī kā na zauq-e-nazar buland

ye kyā ki koī pyaar ke qābil nahīñ rahā

qadreñ badal ga.ī haiñ zamāne ke saath saath

ab ishq bhī hayāt kā hāsil nahīñ rahā

juzv-e-hayāt ban ga.iiñ tūfāñ kī shorisheñ

armān-e-ham-kinārī-e-sāhil nahīñ rahā

'mansūr' kyā hai ab jo karūñ un pe maiñ nisār

jis dil pe naaz thā mujhe vo dil nahīñ rahā

agla sa kyon wo walwala-e-dil nahin raha

kyon shauq-e-sair-e-kucha-e-qatil nahin raha

ab kyon wabaal-e-jaan hui ja rahi hai zist

kya ab tere sitam ke bhi qabil nahin raha

mear-e-husn-o-ishq ki pasti ko dekh kar

apna to dil lagane ka ab dil nahin raha

aisa bhi ho kisi ka na zauq-e-nazar buland

ye kya ki koi pyar ke qabil nahin raha

qadren badal gai hain zamane ke sath sath

ab ishq bhi hayat ka hasil nahin raha

juzw-e-hayat ban gain tufan ki shorishen

arman-e-ham-kinari-e-sahil nahin raha

'mansur' kya hai ab jo karun un pe main nisar

jis dil pe naz tha mujhe wo dil nahin raha