agle paDaw par yunhi KHema lagaoge

agle paḌāv par yūñhī ḳhema lagāoge

jitnī bhī hai safar kī thakan bhuul jāoge

bāhar havā-e-tez lagā.e hue hai ghaat

ghar se jo nikle ab ki palaT kar na aaoge

har shaḳhs apne aap meñ masrūf hai yahāñ

kis ko fasāna-e-dil-e-muztar sunāoge

tābinda-ḳhvāb dekh kar āñkheñ khuleñgī jab

zulmāt ke baġhair yahāñ kuchh na pāoge

ik dūsre se ho ke alag ḳhush rahegā kaun

taḌpeñge ham bhī ḳhud bhī tum aañsū bahāoge

jā to rahe ho jins-e-vafā kī talāsh meñ

saath apne yāsiyat ke sivā kuchh na lāoge

girdāb sāmne hai muḳhālif havā.eñ haiñ

kashtī ko kaise jānib-e-sāhil ghumāoge

jis ko ḳhulūs samjhe hue the vo kyā huā

kitnā yaqīn thā tumheñ dhokā na khāoge

parbat haiñ barf-posh qadam dekh-bhāl kar

'ābid' phisal ga.e to sambhalne na pāoge

agle paDaw par yunhi KHema lagaoge

jitni bhi hai safar ki thakan bhul jaoge

bahar hawa-e-tez lagae hue hai ghat

ghar se jo nikle ab ki palaT kar na aaoge

har shaKHs apne aap mein masruf hai yahan

kis ko fasana-e-dil-e-muztar sunaoge

tabinda-KHwab dekh kar aankhen khulengi jab

zulmat ke baghair yahan kuchh na paoge

ek dusre se ho ke alag KHush rahega kaun

taDpenge hum bhi KHud bhi tum aansu bahaoge

ja to rahe ho jins-e-wafa ki talash mein

sath apne yasiyat ke siwa kuchh na laoge

girdab samne hai muKHalif hawaen hain

kashti ko kaise jaanib-e-sahil ghumaoge

jis ko KHulus samjhe hue the wo kya hua

kitna yaqin tha tumhein dhoka na khaoge

parbat hain barf-posh qadam dekh-bhaal kar

'abid' phisal gae to sambhalne na paoge