ahd-e-rafta ki hikayat karbala se kam na thi

ahd-e-rafta kī hikāyat karbalā se kam na thī

zindagānī nasl-e-ādam par balā se kam na thī

ḳhuun ke dariyā kī lahroñ meñ bashar ġharqāb thā

vaqt kī raftār goyā bad-duā se kam na thī

phir rahe the hukmarāñ kashkol le kar dar-ba-dar

bandagī kī zāhirī sūrat gadā se kam na thī

har taraf ḳhūnīñ bhañvar har samt chīḳhoñ ke azaab

mauj-e-gul bhī ab ke dozaḳh kī havā se kam na thī

mābadoñ meñ jin ke īmāñ par lahū chhiḌkā gayā

un ke ḳhāl-o-ḳhat kī raunaq pārsā se kam na thī

zulm ke ifrīt ne shahroñ ko vīrāñ kar diyā

yuuñ to barbādī jahāñ meñ ibtidā se kam na thī

aisī zālim dāstāneñ kaan meñ paḌtī rahīñ

haisiyat jin kī tilismī mājrā se kam na thī

jaane kis gardāb-e-zulmat meñ Duboyā hai unheñ

jin kī raushan rahnumā.ī nāḳhudā se kam na thī

ahd-e-rafta ki hikayat karbala se kam na thi

zindagani nasl-e-adam par bala se kam na thi

KHun ke dariya ki lahron mein bashar gharqab tha

waqt ki raftar goya bad-dua se kam na thi

phir rahe the hukmaran kashkol le kar dar-ba-dar

bandagi ki zahiri surat gada se kam na thi

har taraf KHunin bhanwar har samt chiKHon ke azab

mauj-e-gul bhi ab ke dozaKH ki hawa se kam na thi

mabadon mein jin ke iman par lahu chhiDka gaya

un ke KHal-o-KHat ki raunaq parsa se kam na thi

zulm ke ifrit ne shahron ko viran kar diya

yun to barbaadi jahan mein ibtida se kam na thi

aisi zalim dastanen kan mein paDti rahin

haisiyat jin ki tilismi majra se kam na thi

jaane kis gardab-e-zulmat mein Duboya hai unhen

jin ki raushan rahnumai naKHuda se kam na thi