ahl-e-jahan ko mujhse adawat hai kya karun

ahl-e-jahāñ ko mujh se adāvat hai kyā karūñ

ye tarz-e-intiqām-e-mohabbat hai kyā karūñ

nākāmī-e-vafā pe nadāmat hai kyā karūñ

ai dil ye ek talḳh haqīqat hai kyā karūñ

ḳhud ġham-pasand merī tabī.at hai kyā karūñ

is ko har ek rañj meñ rāhat hai kyā karūñ

iz.hār-e-dard-e-dil bhī kuchh āsāñ nahīñ magar

zabt-e-sitam bhī ek musībat hai kyā karūñ

apnā rahā huuñ ġham ko baḌe ehtirām se

roz-e-azal se ye mirī aadat hai kyā karūñ

dil kā qarār chhīn liyā kis kī yaad ne

ye zindagī-e-hijr musībat hai kyā karūñ

mere payām-e-mehr-o-vafā kā asar ho kyā

duniyā hī be-niyāz-e-mohabbat hai kyā karūñ

be-vaj.h jis ke naaz uThātā huuñ raat din

us bevafā ko mujh se adāvat hai kyā karūñ

apnī musībatoñ kā kisī se gila nahīñ

apnā hī dil mire liye aafat hai kyā karūñ

dil meñ taḌap hai soz hai ġham hai malāl hai

ai jazb-e-shauq ye mirī qismat hai kyā karūñ

armān aish kā na tamannā nashāt kī

jo mil gayā usī pe qanā.at hai kyā karūñ

himmat-shikan haiñ rāh-e-mohabbat ke marhale

har moḌ har qadam pe musībat hai kyā karūñ

ḳhud merā dil bhī baat mirī māntā nahīñ

is par bhī ab kisī kī hukūmat hai kyā karūñ

kyā ḳhuub hai ye ālam-e-duniyā-e-shauq bhī

ik bevafā se mujh ko mohabbat hai kyā karūñ

aa.e na aa.e dil ko yaqīñ lekin ai 'kañval'

un ke har ek va.ade meñ lazzat hai kyā karūñ

ahl-e-jahan ko mujh se adawat hai kya karun

ye tarz-e-intiqam-e-mohabbat hai kya karun

nakaami-e-wafa pe nadamat hai kya karun

ai dil ye ek talKH haqiqat hai kya karun

KHud gham-pasand meri tabiat hai kya karun

is ko har ek ranj mein rahat hai kya karun

izhaar-e-dard-e-dil bhi kuchh aasan nahin magar

zabt-e-sitam bhi ek musibat hai kya karun

apna raha hun gham ko baDe ehtiram se

roz-e-azal se ye meri aadat hai kya karun

dil ka qarar chhin liya kis ki yaad ne

ye zindagi-e-hijr musibat hai kya karun

mere payam-e-mehr-o-wafa ka asar ho kya

duniya hi be-niyaz-e-mohabbat hai kya karun

be-wajh jis ke naz uThata hun raat din

us bewafa ko mujh se adawat hai kya karun

apni musibaton ka kisi se gila nahin

apna hi dil mere liye aafat hai kya karun

dil mein taDap hai soz hai gham hai malal hai

ai jazb-e-shauq ye meri qismat hai kya karun

arman aish ka na tamanna nashat ki

jo mil gaya usi pe qanaat hai kya karun

himmat-shikan hain rah-e-mohabbat ke marhale

har moD har qadam pe musibat hai kya karun

KHud mera dil bhi baat meri manta nahin

is par bhi ab kisi ki hukumat hai kya karun

kya KHub hai ye aalam-e-duniya-e-shauq bhi

ek bewafa se mujh ko mohabbat hai kya karun

aae na aae dil ko yaqin lekin ai 'kanwal'

un ke har ek wade mein lazzat hai kya karun