ahl-e-junun ka jab bhi chaman mein guzar hua

ahl-e-junūñ kā jab bhī chaman meñ guzar huā

arbāb-e-fikr ke liye ik dard-e-sar huā

unvāñ har aarzū kā ba-shart-e-nazar huā

afsāna ḳhatm sab kā tire naam par huā

nākāmiyoñ se hausle kuchh aur baḌh ga.e

sau dar khule haiñ band agar ek dar huā

merā mazāq tīrgī-e-shab hai dosto

vo koī aur hogā jo vaqf-e-sahar huā

apnoñ hī kī harīf-e-nazar khā ga.ī use

paidā jahāñ chaman meñ koī dīda-var huā

tere hī iltifāt kā mannat-guzār hai

jo hādisa bhī vaqt se kuchh peshtar huā

nā-puḳhtagī-e-shauq ke aalam meñ ai 'nazar'

jo markaz-e-ḳhayāl banā muntashar huā

ahl-e-junun ka jab bhi chaman mein guzar hua

arbab-e-fikr ke liye ek dard-e-sar hua

unwan har aarzu ka ba-shart-e-nazar hua

afsana KHatm sab ka tere nam par hua

nakaamiyon se hausle kuchh aur baDh gae

sau dar khule hain band agar ek dar hua

mera mazaq tirgi-e-shab hai dosto

wo koi aur hoga jo waqf-e-sahar hua

apnon hi ki harif-e-nazar kha gai use

paida jahan chaman mein koi dida-war hua

tere hi iltifat ka mannat-guzar hai

jo hadisa bhi waqt se kuchh peshtar hua

na-puKHtagi-e-shauq ke aalam mein ai 'nazar'

jo markaz-e-KHayal bana muntashar hua