ai aah teri qadr asar ne to na jaani

ai aah tirī qadr asar ne to na jaanī

go tuj ko laqab ham ne diyā arsh-makānī

yak ḳhalq kī nazroñ meñ subuk ho gayā lekin

kartā huuñ maiñ ab tak tirī ḳhātir pe girānī

Tuk dīda-e-tahqīq se tū dekh zuleḳhā

har chaah meñ aatā hai nazar yūsuf-e-sānī

māmūr hai jis roz se vīrāna-e-duniyā

har jins ke insāñ kī ye maaTī ga.ī chhānī

ik vāmiq-e-nau kā hai samajh chaak garebāñ

kartī hai jo raḳhna koī dīvār purānī

bulbul hī sisaktī na thī kuchh baaġh meñ tujh bin

shabnam guloñ ke muñh meñ chuvātī rahī paanī

hai gosh-zada ḳhalq mirā qissa-e-jāñ-kāh

jab se ki na samjhe thā tū chiḌiyā kī kahānī

juuñ sham.a mujhe sharm hai zunnār kī ai shaiḳh

maalā na japūñ raat ko be-ashk-fishānī

jis samt nazar mauj-e-sarāb aave to ye jaan

hovegī kisī zulf-e-chalīpā kī nishānī

kyā kyā mile lailā-manshāñ ḳhaak meñ 'saudā'

go apne bhī mahbūb kī dekhī na javānī

ai aah teri qadr asar ne to na jaani

go tuj ko laqab hum ne diya arsh-makani

yak KHalq ki nazron mein subuk ho gaya lekin

karta hun main ab tak teri KHatir pe girani

Tuk dida-e-tahqiq se tu dekh zuleKHa

har chah mein aata hai nazar yusuf-e-sani

mamur hai jis roz se virana-e-duniya

har jins ke insan ki ye maTi gai chhani

ek wamiq-e-nau ka hai samajh chaak gareban

karti hai jo raKHna koi diwar purani

bulbul hi sisakti na thi kuchh bagh mein tujh bin

shabnam gulon ke munh mein chuwati rahi pani

hai gosh-zada KHalq mera qissa-e-jaan-kah

jab se ki na samjhe tha tu chiDiya ki kahani

jun shama mujhe sharm hai zunnar ki ai shaiKH

mala na japun raat ko be-ashk-fishani

jis samt nazar mauj-e-sarab aawe to ye jaan

howegi kisi zulf-e-chalipa ki nishani

kya kya mile laila-manshan KHak mein 'sauda'

go apne bhi mahbub ki dekhi na jawani