ai aarzu-e-qatl zara dil ko thamna

ai ārzu-e-qatl zarā dil ko thāmnā

mushkil paḌā mirā mire qātil ko thāmnā

tāsīr-e-be-qarāri-e-nākām āfrīñ

hai kaam un se shoḳh-e-shamā.il ko thāmnā

dekhe hai chāndnī vo zamīñ par na gir paḌe

ai charḳh apne tū mah-e-kāmil ko thāmnā

muztar huuñ kis kā tarz-e-suḳhan se samajh gayā

ab zikr kyā hai sāma-e-āqil ko thāmnā

ho sarsar-e-fuġhāñ se na kyūñkar vo muztarib

mushkil huā hai parda-e-mahmil ko thāmnā

sīkhe haiñ mujh se nālā-e-nai āsmāñ-shikan

sayyād ab qafas meñ anādil ko thāmnā

ye zulf ḳham-ba-ḳham na ho kyā tāb-e-ġhair hai

tere junūñ-zade kī salāsil ko thāmnā

ai hamdam aah talḳhi-e-hijrāñ se dam nahīñ

girtā hai dekh jām-e-halāhil ko thāmnā

sīmāb-vār mar ga.e zabt-e-qalaq se ham

kyā qahr hai tabī.at-e-mā.il ko thāmnā

āġhosh-e-gor ho ga.ī āḳhir lahūluhān

āsāñ nahīñ hai aap ke bismil ko thāmnā

siine pe haath dharte hī kuchh dam pe ban ga.ī

lo jaan kā azaab huā dil ko thāmnā

baaqī hai shauq-e-chāk-e-garebāñ abhī mujhe

bas ai rafūgar apnī anāmil ko thāmnā

mat māñgiyo amaan butoñ se ki hai harām

'momin' zabān-e-behūda saa.il ko thāmnā

ai aarzu-e-qatl zara dil ko thamna

mushkil paDa mera mere qatil ko thamna

tasir-e-be-qarari-e-nakaam aafrin

hai kaam un se shoKH-e-shamail ko thamna

dekhe hai chandni wo zamin par na gir paDe

ai charKH apne tu mah-e-kaamil ko thamna

muztar hun kis ka tarz-e-suKHan se samajh gaya

ab zikr kya hai sama-e-aqil ko thamna

ho sarsar-e-fughan se na kyunkar wo muztarib

mushkil hua hai parda-e-mahmil ko thamna

sikhe hain mujh se nala-e-nai aasman-shikan

sayyaad ab qafas mein anadil ko thamna

ye zulf KHam-ba-KHam na ho kya tab-e-ghair hai

tere junun-zade ki salasil ko thamna

ai hamdam aah talKHi-e-hijran se dam nahin

girta hai dekh jam-e-halahil ko thamna

simab-war mar gae zabt-e-qalaq se hum

kya qahr hai tabiat-e-mail ko thamna

aaghosh-e-gor ho gai aaKHir lahuluhan

aasan nahin hai aap ke bismil ko thamna

sine pe hath dharte hi kuchh dam pe ban gai

lo jaan ka azab hua dil ko thamna

baqi hai shauq-e-chaak-e-gareban abhi mujhe

bas ai rafugar apni anamil ko thamna

mat mangiyo aman buton se ki hai haram

'momin' zaban-e-behuda sail ko thamna