ai ajal ai jaan-e-fani tu ne ye kya kar diya

ai ajal ai jān-e-'fānī' tū ne ye kyā kar diyā

maar Daalā marne vaale ko ki achchhā kar diyā

jab tirā zikr aa gayā ham daf.atan chup ho ga.e

vo chhupāyā rāz-e-dil ham ne ki ifshā kar diyā

kis qadar be-zār thā dil mujh se zabt-e-shauq par

jab kahā dil kā kiyā zālim ne rusvā kar diyā

yuuñ churā.īñ us ne āñkheñ sādgī to dekhiye

bazm meñ goyā mirī jānib ishārā kar diyā

dardmandān-e-azal par ishq kā ehsāñ nahīñ

dard yaañ dil se gayā kab thā ki paidā kar diyā

dil ko pahlū se nikal jaane kī phir raT lag ga.ī

phir kisī ne āñkhoñ āñkhoñ meñ taqāzā kar diyā

ranj paayā dil diyā sach hai magar ye to kaho

kyā kisī ne de ke paayā kis ne kyā pā kar diyā

bach rahā thā ek āñsū-dār-o-gīr-e-zabt se

joshish-e-ġham ne phir is qatre ko dariyā kar diyā

'fānī'-e-mahjūr thā aaj ārzū-mand-e-ajal

aap ne aa kar pashīmān-e-tamannā kar diyā

ai ajal ai jaan-e-'fani' tu ne ye kya kar diya

mar Dala marne wale ko ki achchha kar diya

jab tera zikr aa gaya hum dafatan chup ho gae

wo chhupaya raaz-e-dil hum ne ki ifsha kar diya

kis qadar be-zar tha dil mujh se zabt-e-shauq par

jab kaha dil ka kiya zalim ne ruswa kar diya

yun churain us ne aankhen sadgi to dekhiye

bazm mein goya meri jaanib ishaara kar diya

dardmandan-e-azal par ishq ka ehsan nahin

dard yan dil se gaya kab tha ki paida kar diya

dil ko pahlu se nikal jaane ki phir raT lag gai

phir kisi ne aankhon aankhon mein taqaza kar diya

ranj paya dil diya sach hai magar ye to kaho

kya kisi ne de ke paya kis ne kya pa kar diya

bach raha tha ek aansu-dar-o-gir-e-zabt se

joshish-e-gham ne phir is qatre ko dariya kar diya

'fani'-e-mahjur tha aaj aarzu-mand-e-ajal

aap ne aa kar pashiman-e-tamanna kar diya