ai bhanwar teri tarah bebak ho jaenge hum

ai bhañvar terī tarah bebāk ho jā.eñge ham

saath meñ rah kar tire tairāk ho jā.eñge ham

dekh maujoñ ke havāle is tarah mat kar hameñ

varna ai sāhil tire saffāk ho jā.eñge ham

shāḳh se kaT kar alag hone kā ham ko ġham nahīñ

phuul haiñ ḳhushbū luTā kar ḳhaak ho jā.eñge ham

ham kabūtar kī tarah shaffāf haiñ ma.asūm haiñ

tū miTā.egā to phir chālāk ho jā.eñge ham

oḌh leñge ye zamīñ chādar kī tarah ek din

ek din miTTī tirī ḳhurāk ho jā.eñge ham

sub.h hote hī umīdeñ thapkiyāñ deñgī hameñ

shaam hote hī bahut namnāk ho jā.eñge ham

aag to gulzār ban jaatī hai rāh-e-shauq meñ

tum samajhte the ki jal kar raakh ho jā.eñge ham

zindagī rassī pe chaltā ik madārī hai 'vasīm'

kyā pata hai kab supurd-e-ḳhāk ho jā.eñge ham

ai bhanwar teri tarah bebak ho jaenge hum

sath mein rah kar tere tairak ho jaenge hum

dekh maujon ke hawale is tarah mat kar hamein

warna ai sahil tere saffak ho jaenge hum

shaKH se kaT kar alag hone ka hum ko gham nahin

phul hain KHushbu luTa kar KHak ho jaenge hum

hum kabutar ki tarah shaffaf hain masum hain

tu miTaega to phir chaalak ho jaenge hum

oDh lenge ye zamin chadar ki tarah ek din

ek din miTTi teri KHurak ho jaenge hum

subh hote hi umiden thapkiyan dengi hamein

sham hote hi bahut namnak ho jaenge hum

aag to gulzar ban jati hai rah-e-shauq mein

tum samajhte the ki jal kar rakh ho jaenge hum

zindagi rassi pe chalta ek madari hai 'wasim'

kya pata hai kab supurd-e-KHak ho jaenge hum