ai but jo shab-e-hijr mein dil tham na lete

ai but jo shab-e-hijr meñ dil thaam na lete

kalma meñ bhī hotā to tirā naam na lete

zid par agar aa jaa.eñ ham ai rashk-e-masīhā

mar jaate magar muñh se tirā naam na lete

kāmil koī miltā jo ḳharīdār-e-dil-o-jāñ

ye jins yūñhī bechte ham daam na lete

kyuuñ hashr meñ dīvāna hameñ kah ke pukārā

nafrat thī to ab bhī vo mirā naam na lete

vahshat-kada-e-dahr meñ chaltā jo bas apnā

dushman se mohabbat ke sivā kaam na lete

jārob-kashī miltī agar karb-o-balā kī

hāthoñ se 'munīr' aur koī kaam na lete

ai but jo shab-e-hijr mein dil tham na lete

kalma mein bhi hota to tera nam na lete

zid par agar aa jaen hum ai rashk-e-masiha

mar jate magar munh se tera nam na lete

kaamil koi milta jo KHaridar-e-dil-o-jaan

ye jins yunhi bechte hum dam na lete

kyun hashr mein diwana hamein kah ke pukara

nafrat thi to ab bhi wo mera nam na lete

wahshat-kada-e-dahr mein chalta jo bas apna

dushman se mohabbat ke siwa kaam na lete

jarob-kashi milti agar karb-o-bala ki

hathon se 'munir' aur koi kaam na lete