ai charKH kash aag lage teri chaal mein

ai charḳh kaash aag lage terī chaal meñ

ik ruuh thī har ārzū-e-pā.emāl meñ

har zaḳhm-e-dil hai ahd-e-mohabbat kī yādgār

jī chāhtā hai der lage indimāl meñ

vo bhiiḌ hai ki DhūñDhnā terā to darkinār

ḳhud khoyā jā rahā huuñ hujūm-e-ḳhayāl meñ

kuchh aur māñgnā mire mashrab meñ kufr hai

lā apnā haath de mire dast-e-savāl meñ

in āñsuoñ meñ rang-e-tabassum bhī ghol de

zālim koī maza bhī to aa.e malāl meñ

haañ tum ko bhuul jaane kī koshish kareñge ham

tum se bhī ho sake to na aanā ḳhayāl meñ

tohmat junūñ kī mujh ko gavāra magar 'sirāj'

vo ishq kyā rahe jo had-e-e'tidāl meñ

ai charKH kash aag lage teri chaal mein

ek ruh thi har aarzu-e-paemal mein

har zaKHm-e-dil hai ahd-e-mohabbat ki yaadgar

ji chahta hai der lage indimal mein

wo bhiD hai ki DhunDhna tera to darkinar

KHud khoya ja raha hun hujum-e-KHayal mein

kuchh aur mangna mere mashrab mein kufr hai

la apna hath de mere dast-e-sawal mein

in aansuon mein rang-e-tabassum bhi ghol de

zalim koi maza bhi to aae malal mein

han tum ko bhul jaane ki koshish karenge hum

tum se bhi ho sake to na aana KHayal mein

tohmat junun ki mujh ko gawara magar 'siraj'

wo ishq kya rahe jo had-e-e'tidal mein