ai dasht-e-shab-guzar teri aas ka hiran

ai dasht-e-shab-guzār tirī aas kā hiran

khaa.ī meñ yaas kī jo girā ro paḌī pavan

jā kar dayār-e-marg meñ chhoḌ aa.iye use

jo ghūmtā hai oḌhe hue dard kā kafan

ab tujh se hī jalā.ūñgā ye gul-shuda charāġh

ai TimTimātī raat Dhale chāñd kī kiran

ab tere ḳhat ko DhūñD rahā huuñ varaq varaq

uktā chukā hai harf-o-hikāyat se merā man

āvāz aa rahī hai fasīl-e-najāt se

terī kamī khaTaktī hai ai mere ham-vatan

yazdāñ ḳhatā muaaf girā jā rahā huuñ maiñ

phir aadmī ke bhes meñ aayā hai ahrman

ai dasht-e-shab-guzar teri aas ka hiran

khai mein yas ki jo gira ro paDi pawan

ja kar dayar-e-marg mein chhoD aaiye use

jo ghumta hai oDhe hue dard ka kafan

ab tujh se hi jalaunga ye gul-shuda charagh

ai TimTimati raat Dhale chand ki kiran

ab tere KHat ko DhunD raha hun waraq waraq

ukta chuka hai harf-o-hikayat se mera man

aawaz aa rahi hai fasil-e-najat se

teri kami khaTakti hai ai mere ham-watan

yazdan KHata muaf gira ja raha hun main

phir aadmi ke bhes mein aaya hai ahrman