ai dil aata hai chaman mein wo sharabi tu pahunch

ai dil aatā hai chaman meñ vo sharābī tū pahuñch

le ke pyāla gul kā ġhuncha kī gulābī tū pahuñch

bhar ke sāġhar kījiye ḳhālī ġham-e-daurāñ se dil

ab na kar tāḳhīr ai saaqī shitābī tū pahuñch

pahne qāsid jab talak yak-bār sharh-e-ishtiyāq

le kar ai betāb dil kī iztirābī tū pahuñch

ḳhvāhish-e-dil hai ki kiije sair-e-aqlīm-e-junūñ

Tuk madad ko us kī ai ḳhāna-ḳharābī tū pahuñch

jaa.e hai tanhā shab-e-tārīk meñ vo mehr-vash

āh-e-ātish-bār le kar māhtābī tū pahuñch

tā na phir shā'ir likheñ tausīf-e-bālā-e-butāñ

misra'-e-mauzūñ-o-sher-e-intiḳhābī tū pahuñch

jalva-farmā aaj hai taḳht-e-chaman par shāh-e-gul

le kar ai paik-e-sabā chitr-e-sahābī tū pahuñch

musht-e-ḳhāk apnī ko aalam meñ na zaa.e' kar 'azīz

hind se le tā-najaf ai bū-turābī tū pahuñch

ai 'muhib' ḳhvāhish gazak kī ho jo is mai-ḳhvār ko

hai tirā siina to dūkān-e-kabābī to pahuñch

ai dil aata hai chaman mein wo sharabi tu pahunch

le ke pyala gul ka ghuncha ki gulabi tu pahunch

bhar ke saghar kijiye KHali gham-e-dauran se dil

ab na kar taKHir ai saqi shitabi tu pahunch

pahne qasid jab talak yak-bar sharh-e-ishtiyaq

le kar ai betab dil ki iztirabi tu pahunch

KHwahish-e-dil hai ki kije sair-e-aqlim-e-junun

Tuk madad ko us ki ai KHana-KHarabi tu pahunch

jae hai tanha shab-e-tarik mein wo mehr-wash

aah-e-atish-bar le kar mahtabi tu pahunch

ta na phir sha'ir likhen tausif-e-baala-e-butan

misra'-e-mauzun-o-sher-e-intiKHabi tu pahunch

jalwa-farma aaj hai taKHt-e-chaman par shah-e-gul

le kar ai paik-e-saba chitr-e-sahabi tu pahunch

musht-e-KHak apni ko aalam mein na zae' kar 'aziz

hind se le ta-najaf ai bu-turabi tu pahunch

ai 'muhib' KHwahish gazak ki ho jo is mai-KHwar ko

hai tera sina to dukan-e-kababi to pahunch