ai dil-nashin talash teri ku-ba-ku na thi

ai dil-nashīñ talāsh tirī kū-ba-kū na thī

apne se ik farār thā vo justujū na thī

iz.hār nā-rasā sahī vo sūrat-e-jamāl

ā.īna-e-ḳhayāl meñ bhī hū-ba-hū na thī

kyā sehr thā ki hañste hue jaan de ga.e

vo bhī ki jin ko tāb-e-ġham-e-ārzū na thī

kyā jaane ahl-e-bazm ne kyā kyā samajh liyā

iḳhfā-e-ārzū thī vo chup guftugū na thī

vo kaun sī sahar thī ki roī na phuul phuul

vo shaam kaun sī thī ki ġham se lahū na thī

ham to farefta the 'ziyā' dil kī aañch par

manzūr mahz dilkashī-e-rañg-o-bū na thī

ai dil-nashin talash teri ku-ba-ku na thi

apne se ek farar tha wo justuju na thi

izhaar na-rasa sahi wo surat-e-jamal

aaina-e-KHayal mein bhi hu-ba-hu na thi

kya sehr tha ki hanste hue jaan de gae

wo bhi ki jin ko tab-e-gham-e-arzu na thi

kya jaane ahl-e-bazm ne kya kya samajh liya

iKHfa-e-arzu thi wo chup guftugu na thi

wo kaun si sahar thi ki roi na phul phul

wo sham kaun si thi ki gham se lahu na thi

hum to farefta the 'ziya' dil ki aanch par

manzur mahz dilkashi-e-rang-o-bu na thi