ai gard-baad tarf-e-chaman Tuk guzar kar

ai gard-bād tarf-e-chaman Tuk guzār kar

bulbul ke par paḌe haiñ guloñ par nisār kar

aa.e the aish ke liye so tū na yaañ milā

phir ġham-kada ko uTh chale ham apne haar kar

kyā muskurā ke Taale hai ab phir kab aa.egā

dil be-qarār hotā hai kuchh to qarār kar

dāġhoñ se dil ke siina to hai rashk-e-lāla-zār

haañ ashk-e-surḳh tū bhī to apnī bahār kar

dhajjī bhī ek chhoḌī na dāmān-o-jeb kī

dast-e-junūñ ne luuTā mujhe taar taar kar

vo bhī na aayā aur nazar aane se rah gayā

dekhā mazā na aur dil ab intizār kar

be-chīz to nahīñ ye 'hasan' us galī meñ roz

jā jā ke baat karte har ik se pukār kar

ai gard-baad tarf-e-chaman Tuk guzar kar

bulbul ke par paDe hain gulon par nisar kar

aae the aish ke liye so tu na yan mila

phir gham-kada ko uTh chale hum apne haar kar

kya muskura ke Tale hai ab phir kab aaega

dil be-qarar hota hai kuchh to qarar kar

daghon se dil ke sina to hai rashk-e-lala-zar

han ashk-e-surKH tu bhi to apni bahaar kar

dhajji bhi ek chhoDi na daman-o-jeb ki

dast-e-junun ne luTa mujhe tar tar kar

wo bhi na aaya aur nazar aane se rah gaya

dekha maza na aur dil ab intizar kar

be-chiz to nahin ye 'hasan' us gali mein roz

ja ja ke baat karte har ek se pukar kar