ai intizar-e-subh-e-tamanna ye kya hua

ai intizār-e-sub.h-e-tamannā ye kyā huā

aatā hai ab ḳhayāl bhī terā thakā huā

pahchān bhī sakī na mirī zindagī mujhe

itnī ravā-ravī meñ kahīñ sāmnā huā

chamkā sake na tīra-nasīboñ kī raat ko

hamrāz haiñ tire mah-o-anjum to kyā huā

mujh se kahīñ milā ġham-e-daurāñ to is tarah

jaise mirī tarah se hai vo bhī thakā huā

'jāmī' fazā-e-mausam-e-gul yuuñ udaas hai

jaise kahīñ qarīb koī hādsa huā

ai intizar-e-subh-e-tamanna ye kya hua

aata hai ab KHayal bhi tera thaka hua

pahchan bhi saki na meri zindagi mujhe

itni rawa-rawi mein kahin samna hua

chamka sake na tira-nasibon ki raat ko

hamraaz hain tere mah-o-anjum to kya hua

mujh se kahin mila gham-e-dauran to is tarah

jaise meri tarah se hai wo bhi thaka hua

'jami' faza-e-mausam-e-gul yun udas hai

jaise kahin qarib koi hadsa hua