ai ishq-e-be-niyaz ye kya inqilab hai

ai ishq-e-be-niyāz ye kyā inqilāb hai

ġham kāmyāb hai na ḳhushī kāmyāb hai

mastī meñ har fareb-e-ḳhirad be-naqāb hai

is vaqt jo gunāh bhī kiije savāb hai

fikr-e-ma.āl-e-ishq na kī ham ne ishq meñ

mālūm thā ki ḳhvāb hī tābīr-e-ḳhvāb hai

rusvā.iyāñ haiñ ishq kī me.arāj-e-zindagī

ye tum ne kyā kahā ki zamāna ḳharāb hai

ġham par asar nahīñ hai kisī inqilāb kā

aur ġham bajā-e-ḳhud asar-e-inqalāb kā

hāsil hai lutf-e-dīd magar ye ḳhabar nahīñ

tū be-hijāb hai ki nazar be-hijāb hai

'shāhid' baġhair vaj.h nahīñ nazm-e-kā.enāt

is bazm-e-nāz meñ koī dil bāryāb hai

ai ishq-e-be-niyaz ye kya inqilab hai

gham kaamyab hai na KHushi kaamyab hai

masti mein har fareb-e-KHirad be-naqab hai

is waqt jo gunah bhi kije sawab hai

fikr-e-maal-e-ishq na ki hum ne ishq mein

malum tha ki KHwab hi tabir-e-KHwab hai

ruswaiyan hain ishq ki mearaj-e-zindagi

ye tum ne kya kaha ki zamana KHarab hai

gham par asar nahin hai kisi inqilab ka

aur gham baja-e-KHud asar-e-inqalab ka

hasil hai lutf-e-did magar ye KHabar nahin

tu be-hijab hai ki nazar be-hijab hai

'shahid' baghair wajh nahin nazm-e-kaenat

is bazm-e-naz mein koi dil baryab hai