ai ishtiyaq-e-did bata aaj kya karen

ai ishtiyāq-e-dīd batā aaj kyā kareñ

un se nazar churā.eñ ki ham sāmnā kareñ

un se kaho ki farz-e-rifāqat adā kareñ

mere junūñ pe ahl-e-ḳhirad tabsirā kareñ

un dostoñ kī ham pe ināyat na pūchhiye

vo vaqt aa paḌā hai ki dushman duā kareñ

faiz-e-junūñ se daar kī manzil tak aa ga.e

ab apne qāfile kā kise rahnumā kareñ

ahl-e-talab ba-zauq-e-talab rāh-e-ishq meñ

har intihā ke baad na.ī ibtidā kareñ

kab tak maiñ intizār karūñ daur-e-hijr meñ

ummīd ke charāġh kahāñ tak jalā kareñ

vo mere dil pe barq-e-tabassum girā chuke

ab un ko kyā hazār fasāne banā kareñ

phir kyoñ nigāh-e-barq tavajjoh kare idhar

mauj-e-bahār se jo nasheman jalā kareñ

'shāhid' ham aaj hazrat-e-nāseh se pūchh leñ

dil kā kahā kareñ ki tumhārā kahā kareñ

ai ishtiyaq-e-did bata aaj kya karen

un se nazar churaen ki hum samna karen

un se kaho ki farz-e-rifaqat ada karen

mere junun pe ahl-e-KHirad tabsira karen

un doston ki hum pe inayat na puchhiye

wo waqt aa paDa hai ki dushman dua karen

faiz-e-junun se dar ki manzil tak aa gae

ab apne qafile ka kise rahnuma karen

ahl-e-talab ba-zauq-e-talab rah-e-ishq mein

har intiha ke baad nai ibtida karen

kab tak main intizar karun daur-e-hijr mein

ummid ke charagh kahan tak jala karen

wo mere dil pe barq-e-tabassum gira chuke

ab un ko kya hazar fasane bana karen

phir kyon nigah-e-barq tawajjoh kare idhar

mauj-e-bahaar se jo nasheman jala karen

'shahid' hum aaj hazrat-e-naseh se puchh len

dil ka kaha karen ki tumhaara kaha karen